(Èl-Gueuye-Noere – 11inme) 25/01/2021
"Eviè Bijhe" est soûlmint l' tite d' èç årtike yet nén l' tite d' ene shûte d' ene ramexhnêye di noveles walon-cåzante rexhowe pindant l' mitan del dijhnêye 2000.
A l' atake do moes di fevrî, dji va daler e Flande, pus speciålmint e-n Anverse. "Pocwè daloz vos rola ?", mi dmandrîz vos. Pask' i dji va rola po èn Erasmus ki va durer shijh moes. Èm principå adierça est doube : sayî d' kine èm cwåtrinme anêye al univiersité, pus amidrer èm zône e neyerlandès ; li lingaedje da Vogel, dit-st i. "Pocwè awè tchoezî li Flande conte li Neyerlande ?", mi dmandrîz vos. Pask' el tuzance flaminde m' assaetche vraiymint. Minme si dj' a todi viké el Beldjike, el Walonreye yet ki dj' a stî bråmint e Westende, e Noû-Pôrt u core el Panne tot-z estant efant ; dji n' pinse nén bén conoxhe mes vijhéns bijhreces. Çoula est l' minme dins l' ôte sinse eto. On flamind u ene flaminde ki vike el Flande, mins ki va e vacances e-n Årdene, el Hôte u core el Basse Fagne.
Come li rnovele sovint on flamingant, avou li ci dji n' so måy d' acoird, ecsepté so ene tchôze. E-n efet, ci flamingant rola est on politikî nén veyou voltî e Walonreye ; i fåt dire k' ès amiståvté eneviè l' Walonreye n' egziste azår nén. Cisse politikî rinovele ki les Walons yet les Flaminds vicnut dins deus diferintes democraceyes. Dji croe k' ç' est l' seu côp e m' vikance wice dji va esse todi d' acoird avou Bart De Wever : el Beldjike est divizêye e deus.
El deujhinme pårtêye del anêye univiersitaire va cminxhî e rodje code. Çoula acsegne ki les studiants vont co esse seré dins leus kots obén dins leus måjhones pindant, å moens, on moes. Dji m' voe d'dja : discovrî Anverse so m' lét. Ç' est l' seule tchôze ki dji porè fé. I n' est nén d' kession d' aler a l' ouxh, såf po daler ké del marmandje. Dji so ene sakî ki respecte todi les lwès ; sins apinser el råjhnåvité d' ces lwès rola. Dji so ç' k' on lome voltî on citweyin egzimplaire. Houte di çoula, pocwè awè des luçons coir-z-è-n-och, cwand on pout awè des luçons sol copiutrece ? On wangne do tins ; on-z est mî rashît ey on n' est nén oblidjî d' vir les tiesses des cis k' on voet evî. Di pus, li monde veritåve ç' est "odoerwesse" : li nateure, l' univiers, li sociåvisté et tchik et tchak ; tot çoula vént do "foû vî vî tins".
Padvant d' aler dins l' veye da Bart De Wever, dji doe co rimpli bråmint d' foyes. Cis bouyes don les piceures principåles sont li loignisté ey el angoxhe. Enute, les djins doevnut djurvi l' angoxhe. Pocwè toursiyî conte åk k' est måhaitî, adon k' on pout viker avou yet mete dins ès cévé come cwè : on l' pout edurer ? Tot est lodjike, cwand on rwaite bén l' principe. Fé ene sacwè målåjhey alorse k' on pout fén ene sacwè åjhey n' est ç' nén èn astoca d' sûtisté del espece uminne ?
- Dijhnêye : Voir l'article "Vint anêyes pierdowes"
- Råjhnåvité : Légitimité ; opportunité
- Odoerwesse : Démodé ; vieux jeu (calqué du néerlandais : ouderwets)
- Cévé : C.V. ; curriculum vitae