(Èl-Gueuye-Noere – 24inme) 16/10/2021
C' est ene advize ki dj' ô sovint. L' inglès, c' est li seu lingaedje k' on-z åreut podbon dandjî. Ah, si les djins pinsnut come çoula. Mi, dji vos vou bén acertiner k' c' est åjhey po daler fé do tourisse. Po daler pattavå sol Daegne, c' est l' veur k' c' est mî d' el fé avou el lingaedje da Shakespeare. Tenawete, vos li ploz fé sins ; ci n' est nén impossibe, savoz. Adon, k' seulmint ene djin so cénk cåze ci lingaedje djermanike ci. Yeyet co ; on n' a nén co rwaitî leus liveas. Gn a bråmint des inglès-cåzants avou on fwaibe livea. C' est çk' on lome voltî : li globish. Ene varyisté d' inglès avou del pôvurté linwistike.
Ci n' est nén li prumî côp k' on lingaedje est rwaitî come li lingaedje del Daegne. Come d' efet, pindant l' Antikité, ci lingaedje la, c' esta li latén. Totfeye, li Daegne, a cist epoke, c' esta seulmint l' Urope eyet l' Afrike bijhrece. Do moens, avou nos iys d' Uropeyins. Tenawete, l' efet esta l' minme. Asteure, li latén est moirt eyet ramoirt. Pus lanawaire, li lingaedje del Daegne, c' esta li francès. Li lingaedje da Molière est todi foirt impôrtante sol Daegne, mins ès poûssance s' a aflåwi. Copuvite dispoy ki l' inglès est li lingaedje li pus djazé ey el lingaedje li pus aprindou. Po-z awè ene mitan oyou les Kebecwès pårler. Dji pou vs acertiner k' ça shonne leu fé må. Dj' ô bén, d' vir l' Inglès pus grand k' el lingaedje d' oyi des Paridjots. Vacobén k' les Kebecwès n' sont nén des walon-cåzants ; is djereyrént bén d' si distrure.
Tot cåzant des lingaedjes da Shakespeare eyet da Molière. Dji m' sovén bén k' i gn a cwate ans, dj' aveu léjhou on live e francès. El tite, c' esteut : La langue mondiale ([WA] Li lingaedje del Daegne). L' oteure, c' esteut Pascale Casanova. Li live est purade målåjhey a lére, mins li sudjet dimane mo ahessûle.
Po-z esse oniesse å rgård di vozôtes, dji voe voltî cwand ene sakî m' forbate : "L' inglès, c' est l' seu lingaedje ahessûle". Paski pocwè ? Cisse dijhêye inla mostere el sûtinawisté des djins. Çki fwait plaijhî a m' firisté. Çoula mostere k' les djins polnut, afeye, esse grandiveuses. Do côp, dji m' sint ene miete pus sutî k' zels. Paski, mi, dji sai bén cåzer cwate lingaedjes. Dj' a eto sacwants kinoxhaedjes dins deus ôtes lingaedjes. Houte di çoula, moens les djins djåznut des lingaedjes ; pus i gn a do boutaedje po les linwinceus. Oyida, i fåt des scoleus po les acsegnî. I fåt ossu des ratourneus, et tchik et tchak. Vnoz nén m' acertiner k' nos avans, enute, des ratourneus éndjolikes. Ces éndjoles rola, eles ni savnut nén rashire on tecse comifåt, savoz.
Djåzer k' on lingaedje, ci n' est nén gawdieus. Al copete do mårtchî, s' il est cåzé pa mwintès djins. Çki dji vou dire, c' est k' dispoy ki dji comprind, scrî eyet djåze li walon. C' est come si dj' esteu mimbe d' ene soce sicrete ; d' ene leccion. Dj' a l' minme avou li bokmål eyet li daenwès, minme si dji n' sai k' dire ki sacwants mots.
- Sûtinawisté : Paresse intellectuelle