(Èl-Gueuye-Noere – 17inme) 02/06/2021
Çoula va fé bén rade nouv ans k' Paul Magnette a divnou borguimwaisse di Tchålerwè. Il a stî eléjhou e-n octobe 2012, mins ès mandat aveut d'dja stî remoenné e 2018. Si tot va bén, i va dmaner borguimwaisse disk' e 2024. Po s' prumî mandat, Paul Magnette aveut tchoezî d' fé on kabinet avou les umanisses (cdU) eyet les liberås (MR). On kabinet avou les troes pårtis habituels, dit-st i. Po s' deujhinme mandat, el socialisse a fwait on kabinet avou el novea pårti, C+, ki ricandje el cdU dins ç' veye ci, ey Ecolo. Bråmint des djins årént vlou vir el PBB didins, mins ci pårti ci eyet l' PS s' margaynut sovint. Is s' disbourdnut l' onk l' ote : les deus s' etindnut vraiymint nén. Totfeye, les comunisses pôrént divni l' pus grand pårti do 6000, e 2024. Do côp, Paul Magnette doet prinde asteme. Tchålerwè dimane ene batreye po les deus gåtches.
I n' fåt nén rovyî ki dispoy el rebanaedje des comenes ; dj' ô bén, dispoy 1977 ; les socialisses avént stî cåzumint todi å povwer. Aprume, ns avans yeu Lucien Harmegnies etur 1977 eyet 1983. Li shuvant, c' esteut l' "Van Cau" k' a stî borguimwaisse disk' al fén do deujhinme meynaire. Padri lu, on-z a yeu l' "Van Gompel", shuvou pa el "Casaert" k' a dvou demissioner d' ès mayorat. Ces troes dierins omes estént foirt kinoxhous po awè fé deus tchozes. D' on costé, ils avént plonkî l' 6000 dins ene noere dicwelixhance. D' èn ôte costé, is manaedjént des afwaires foû blankeyes. Etur 2006 eyet 2012, on s' a rtrové avou Jean-Jacques Viseur (cdU) ey Éric Massin (PS) : deus mayeurs toûnreces.
On-z a veyou, avou l' prumire parteye d' el trevén Magnette, li rinovea del Basse-Veye. Ci hamtea la esteut, pindant lontins, dins les ovraedjes ki parexhént infinis. Dins les ôtes pitits bans, on-z a veyou des rotes k' avént stî radierceyes. Houte di çoula, e 2016, Paul Magnette s' aveut, pindant on ptit tins, scontré el teribe Acoird economike et comierçå globå etur l' Union Uropeyinne ey el Canada. El Walonreye, virpus Tchålerwè, ont stî sol divant del sinne po ene clapante cåze. Mins nerén, çoula s' aveut fini e-n asblawete. Les djins avént yeu l' droet d' espwerer ene sacwè : c' est d'dja mo åk. Pindant l' erî-dierinne anêye d' ès mandat, les Tchålerwetîs eyet les Tchålerwetresses avént assisté al ratournêye d' ene eterprijhe etazunyinne k' avént metou totplin d' bouteus dins l' mizere.
Avou el deujhinme parteye d' ès trevén, el veye a comincî a-z ataker les ovraedjes po radiercî el Hote-Veye k' a divnou on viyaedje rimpli di tchenés. Les pordjets po radiercî cisse hamtea ci ont dandjreus veyou l' opôzucion di bråmint di Tchålerwetîs. Ci troke di dmorants la s' plindnut des boutaedjes. Don-come-don, a tchaeke côp k' ene sakî edåme ene sacwè, i gn årè todi onk po ramadjî. Dj' espwere, cwand minme, k' i pinse voltî åzès ôtes pitits bans do Noer Payis ki porshuve leu elaidixhaedje. Dji djåze di Djumet wice les plaeces di Goyissåt eyet di Tchîf-leu, på egzimpe, divnnut des aites. Dji djåze ossu di Dårmè, k' a divnou on niyå a mizeres sociales. Dji djåze eto di Mårciene, k' a divnou ene "mini-Gaza". Sins rovyî, Djilî ki n' est pus k' ès-n' ombe. Tot pinsant a Montgneye-so-Sambe ki n' est nén spargnî. El bacluze parexhe foû-mzeure, mins dji sai k' on pout fé åk di bea.
Motoit ki dj' e dmande trop, mins dji tuze k' des iperbazårs pattavå n' sufixhnut nén po amidrer el cwålisté d' vicance. El veye n' est nén nete nerén. Dj' aveu d'dja dinoncî ces problinmes inla dins èn ôte årtike. Tot çki dji tegue, c' est k' el veye ritrove ès firisté. Totfeye, dji comprind bén k' Rome n' a nén stî fwaite pindant ene djournêye. Adon, ki pou-dju apinser del trevén Magnette ? I shonne fé s' bouye. I shonne esse oniesse ; dj' ô bén ; nén rôler ès peupe. Sins pus, ni moens.
- Setazinme => Setaze : Dix-septième => Dix-sept (au lieu de, respectivement : Dijh-setinme et Dijh-set)
- Kabinet : Coalition
- cdU => cinte democrate ey Umanisse : cdH => centre démocrate et Humaniste
- Pårtis habituels : Partis traditionnels
- PBB => Pårti Bedje do Boutaedje : PTB => Parti du Travail de Belgique
- Virpus : Voir l'article "Skide eyet Soçons"
- Iperbazårs : Voir l'article "Tchålerwè : ene bele veye ?"