(Èl-Gueuye-Noere – 18inme) 23/06/2021
On voit tous le temps qui passe, c' est ene tchanson da Louis Petyt (ki s' lomeut davance : Louis Strike) avou Valii, k' a rexhou i gn a deus ans. Ces deus omes ci sont deus rappeus tchålerwetîs. Motoit, vos vs sovnoz ki dj' aveu ledjirmint richnicté Tamara Payne eyet Kiwi Jackson dins onk d' mes ôtes årtikes (Tchålerwè : ene bele veye ?). Deus djins ki, po mi, tire el tuzance del veye djus. Cwek' ça, cwand ene sacwè est bén, i l' fåt mostrer eto. E-n efet, dji so pår awureus d' awè discovri çoucial. Tot rwaitant Valii, dji n' kinoxhe nén ès discografeye. Do côp, ci sereut foirt målåjhey di dner èm responda so lu. Mins nerén, dji kinoxhe mî Louis Petyt. Dji rituze ki dj' aveu schoûté s' prumî adierçaedje : Qu'est-ce qu'ils ont fait de ma ville, e 2013. A cist epoke ci, les boutaedjes del Basse-Veye avént comincî eyet nolu croeyeut a on rnovea di Tchålerwè. Enute, el rebanêye comene shonne daler ene mitan mî. Rivnant, asteure, al discografeye da Louis Strike. I gn a sacwantès d' ses muzikes k' ont ene certinne polance.
Dji va m' ataker al parole. Dins cisse tchanson ci, Louis Petyt ni fwait k' el erfrin, k' nos voerans padri. El prumire ranguene, c' est ene ranguene d' introspeccion. Come d' efet, i djåze voltî d' ès cårire. Houte di çoula, i djåze ossu d' ene ôte djin ki lu vout do må, pask' il est monté pus hôt. Ene atuze k' est sovint riprindowe dins l' rappigne. Adon, on-z ôt ene clapante antifråze acpagntêye d' ene nozêye axhiltance. Dins l' deujhinme ranguene, ns estans etur l' introspeccion eyet l' dinonçaedje des arokes d' nosse sistinme di vicaedje. Åd triviè, l' mwaijhe prononçaedje d' on mot inglès rind bén avou l' rime. El dierinne ranguene est, motoit, li moens ahessûle. On dimane todi dins l' introspeccion. Do côp, on pout corwaitî el erfrin da Louis Petyt e kékès fråzes. Cist ome la halcote on cotuza avou l' tins, k' est eto l' tite (vir padzeu). El "dicåçtaedje" est, pinse-dju, po Valii. Soet pask' i adegne ès-n ovraedje ubén pask' is sont des soçons, virpus les deus cas eshonnes.
Dji n' va nén corwaitî les imådjes e parfondeur. Tenawete, on pout noter el messaedje politike d' èç tchanson ci. I shonnreut k' Valii boute po on sindicat d' gåtche djondant åzès comunisse eyet socialisse. Motoit bén k' i disfind les valeurs d' ces deus ideyolodjeyes rola. Dji n' va nén eto diner m'-n' advize so çoula, aprume k' ç' est n' est nén ahessåve tot djazant d' cist ouve rola. Tchaeconk a ses idêyes yet tertos conoxhe el tchanson di "tchaeconk si gosse". Seulmint, ça candje ene mitan di çk' on-z ôt evî dins l' rappigne : dj' ô bén, les rappeus ki cåze pår d' leus liårds, d' leus pinikes, d' leus doreyes dints, d' leus pistolets et tchik et tchak. On pout esse maké d' vir k' des ptitès produjhaedjes coinreces ki sont xhiltantes n' vont nén lon. Al copete do martchî, cwand i gn a des gros buddjets ki fijhnut del muzike pî k' on djonne di cwate ans eyet k' is si trovnut dins les clasmints.
Dji tuze a scrire, afeye, des papîs éndjolikes so des ovraedjes tuzançreces del Walonreye k' is l' meritnut. Dj' el aveut d'dja fwait on côp. Comint poreut-dju l' rovyî ? C' esteut èm tote prumire såye : El meyeu fime sereut walon. Èm prumî årtike roci k' a eto stî riprindou dins on limero di Li Rantoele. Do côp, c' est l' deujhinme côp : on fime, pus ene muzike. A l' avni, dji va rwaiti après on live, ene pîce di teyåte u core ene pondeure ; dji n' sai nén co. Tot çki dji pou dire, c' est ki sins l' parminêye d' asteure, bråmint des djins n' årént nén comprindou k' el tuzance est consecante dins nos vicances. L' umin, c' est ene biesse ki saizixh el nateure d' ene sacwè padri l' awè pierdowe.
- Ûtazinme => Ûtaze : Dix-huitième => Dix-huit (au lieu de, respectivement : Dijh-ûtinme et Dijh-ût)
- Introspeccion : Introspection
- Antifråze : Antiphrase
- Virpus : Voir l'article "Skide eyet Soçons"