(Èl-Gueuye-Noere – 23inme) 16/09/2021
El Walonreye ey el resse del Beldjike, l' esté årè stî pus tchenou ki bleu. L' esté n' aveut pus stî ossu froed dispoy des anêyes. Cist anêye ci, ça a stî l' foû-rîle contråvmint åzès dierinnes anêyes. Aprume ezès moes di djulete eyet d' awousse. Po on côp, on n' a nén yeu des timperateures ki vont diski des triyårds di digrés. Mins nerén, el mitan del Walonreye a stî gaeyêye avou les grossès aiwes. Ene rascråwe di pus k' on boket d' el djintrinnté a kinoxhou. Des etrevéns k' sont peneus, disvoyîs, alårmants eyet mortels.
Gn årè todi èn Enocint XIV po atcheryî eyet dire foû ses atuzêyes. I vs direut voltî k' ça s' ava ddja passé i gn a cint ans e Mårciene, på egzimpe. Çk' i rovêye bén sovint, c' est ki l' Mårciene di dinltins n' est nén l' Mårciene d' asteure. Houte di çoula, i n' fåt nén rmete les grossès aiwes d' on ptit ban å cis d' ene stindêye ki fwait pus d' ût meyes m². Gn årè co totplins d' "sincieus" dins vos kinoxhances po vs acertiner k' c' est normå. Gn årè co les pretchi-pretchas po vs forbate. C' est l' veur ki tertos resse stampé a rwaitî l' tins ki passe. C' est eto l' veur k' cåzu nolu n' fé gote.
Cåzu tertos shonne awè ès-n' advize ladsu. I s' passe, afeye, k' el bate sol reschandixhaedje del Daegne divegne ene bate politike. Awè ès-n' advize so ene sacwè, c' est bén. Pol reschandixhaedje del Daegne, nos avans puvite dandjî d' fijhaedjes. Nos n' serans nén xhorés på viyès margayes ideyolodijkes. Ådzeu d' ça, ene troke di djins voet eto voltî di trover des coupåbes. Gn a des djins k' sont come çoula ; mins bon, ki vloz ? Zelzôtes, vozôtes ey èm-minme, nos estans må prins. N' el rovians nén.
Padeco, dji n' sai nén s' i fåt xhaxhler ubén braire. Avou des djins ki tchoûlnut cwand i gn a del plouve. Prindoz asteme ki dji djåze bén del plouve normåle ; dj' ô bén, nén li ci ki cåze des grossès aiwes. Ki ploût el Walonreye, c' est naturel ; savoz. Nos paxhîs end ont mezåjhe. I fåt sepi eto k' avou les grossès stofeurs des dierinnes anêyes, i gn a yeu des sormorances. Adonpwis, dj' inme mî d' awè èn esté avou del plouve, tot plant viker. Al plaece d' èn esté avou bråmint d' solea, mins tot-z estant oblidjî di dmaner al måjhone. Po cist anêye ci, cisse såjhon cial ns årè dné ene novele rafiya po l' avni. Come d' efet, li waeyén-tins si bresse pus ecoraedjant rwaitant l' fén del parminêye å cronivirûsse 19. Djusse : prindans asteme a n' måy vinde li pexhon tant k' naiveye co dvins s' xhiyon.
Cist epoke ci, ele ns årè bén rilevé. El rascråwe do moes di djulete, ele ns a bén mostré çk' i nos rastind avou les pûnes ecolodjikes. Li parminêye ns a ossu mostré k' nosse societé doet s' amidrer. Nerén, padvant d' amidrer l' societé ubén ene sakî d' ôte ; aprume k' i fåt s' amidrer divintrinnmint.