(Èl-Gueuye-Noere – 25inme) 19/10/2021
« Cwand l' amersuté vént », ci sereut l' manire avou wice ki dji ratoûnrè bén « Quand l'amer monte ». Ci tite ci, c' est l' tite d' ene muzike da Saule. Cist ome la, c' est on tchanteu walon eyet francès-cåzant. Mi, dji n' va nén corwaitî el tecse. Paski pocwè ? Aprume, dji n' kinoxhe nén vraiymint l' sinse d' èç tchanson la. Ossu, dj' inmreu mî k' vos rloukîxhe après so les waibes po k' vos l' schoutéxhe on côp. Houte di çoula, dji voe evi di todi fé les minmès sacwès. El vicance chamtêye ; mi avou !
Tot rwaitant Baptiste Lalieu, dj' ô bén « Saule », dj' a podbon schoûté voltî ès dierin albom. Copuvite avou ès ritchantaedje di « Les démons de minuit ». El dierinne tchanson rola, c' est aprume ene tchanson d' ene binde francesse d' el mitan del dijhnêye ûtante : Images. El prumire varyisté, c' est avou des clavîs timpesse. Çoula dimane foirt hårpiyant. Dji n' a måy comprindou comint les djins polnut vir cisse tchanson la voltî. Do moens, el varyisté oridjinåle. Come d' efet, Saule l' a ritchanté. Dji vos leye l' aschoûter po rimete el laide oridjinåle å bea ritchantaedje.
El vicance pout esse padecô rade amere. Çki pout esse tot ossu rade mo scrandixhant. Mi, dji pou vos l' dire åjheymint, savoz. Dji n' so nén rola po djåzer d' mes rujhes. Copuvite ki vozôtes, vs av ddja vos problinmes eto. Adonpwis, dj' inme mî k' on-z åye eshonne on hant nén trop djondant. Foiravant, k' c' est ene gazete eyet nén on kifessionå. Mins nerén, c' est bén des biyets d' oumeurs ki dji scrî. Çki dj' vos vou fé brotchî foû. C' est ki dji dene èm-n' advize so kékès sacwès, sins vraiymint djåzer d' mi.
Po rivni a l' amersuté, dji vs acertinreu voltî k' ele pout vni d' pattavå. Dj' ô bén, vni d' vosse mestî, vosse famile, et vos nd åroz. Afeye, ele pout vni d' puzieurs costés. Nolu pout candjî ses traeyins come çoula. Sapinse åzès neyerlandès-cåzants: het leven gaat niet altijd over rozen ; mins bon, ki vloz fé ? D' ayeur, dji voereu voltî d' vir ci rime-rame cial ratourné e no bea lingaedje walon. K' e pinsoz ? Dji n' a nén co trové on dijhaedje avou l' minme sinse dins ci lingaedje ci. A-z aveuri, tot çoula.
Come dj' el scrijheu a l' epoke, dins m'-n' årtike : Codåné al vicance. Sacwants volnut erdivni des efants, virpus des gnognos. Totfeye, mwintès sakîs ont l' misse d' esse ralé. Djans : nolu n' est binåjhe roci ! I n' dimane k' a transi d' ses eguegnes. Si vos n' end avoz pont, vos ploz todi e-n atuzler. Gn a des djins k' askepyî voltî des rujhes. Li pus sovint pask' is s' agrancixhnut. Do côp, i fijhnut çoula eyet peler l' vinte da nozôtes avou on coutea di bwès. Mi, dji n' di nén dank a zelzôtes. Come d' efet, dji n' vou nén k' l' amersuté vnanxhe. L' amersuté, c' est ene miete come el mer. Ça monte ; ça dischind. Tenawete, dji pinse ki vs el årîz comprindou padvant ki dj' el sicreye.
- Ritchantaedje : Reprise d'une chanson
- Kifessionå : Journal intime. Toutefois, le mot « kifessionå » existait déjà, mais dans le sens « confessionnal d'une église ».
- Virpus : Voir l'article « Skide eyet Soçons ».