(Èl-Gueuye-Noere – 27inme) 13/11/2021
Po l' atake do novea pårti d' foite droete : Chez Nous. Li prezidint ey onk des askepieus, c' est Jérôme Munier eyet Gregory Vanden Bruel. Ces deus omes la ont invité Tom Van Grieken eyet Jordan Bardella. Tom Van Grieken, c' est li prezidint do Vlaams Belang. Jordan Bardella, lu, c' est li prezidint do Rassemblement National, k' est l' novea no do Front National, el France.
Tom Van Grieken åreut, adon, trové des soçons e Walonreye. Motoit k' el pårtimarionet do Vlaams Belang ; dj' ô bén, Nos gens d'abord ; va disparexhe ? Cwand dji rwaite asteure so on rantoele di soçnaedje, dji voe k' il est todi actif. Avou ès pårtimarionet eyet Chez Nous, li Vlaams Belang a, asteure, deus côps pus d' poûssance. Totfeye, ci n' esteut nén cisse troke di Flamingants rola k' is vlént s' dislaxhî des Walons ? Ces minmes Flamingants ci k' ont todi rwaitî les Walons come des magneus di pan payård ? Diåle ki siya ! Adon, pocwè vni djobiner del politike walone ? Dji croe awè l' response. Tom Van Grieken ey ès binde volnut k' el Flande si dislaxhe del viye Beldjike. Après ça, dji n' sai nén s' is volnut vraiymint k' el Flande divne on payis ubén k' el Flande ridjonde el Neyerlande. Tenawete, les estremisses flaminds ont dandji d' èn aloyî walon. Come d' efet, i sereut mî k' les deus bokets si schåynuxhe sins s' mamborner. Come ça a stî avou les peupes tchekes yet slovakes.
Jordan Bardella ey el Rassemblement National årént trové on novea amisse eto. Sovnoz, l' ancyin Front National francès esteut foirt djondant avou li ci del Beldjike. Ci pårti ci d' èç payis rola m' fé moens sogne ki l' ôte. Do moens, disk' asteure. Come di djusse, li Rassemblement National s' copete nén podbon al Walonreye ouy. Cwek' ça, prindans asteme po l' avni. Chez Nous ey el novea Front National francès pôrént, motoit, si rapepryî eshonne. Çki sereut mo riscant po l' avni del Walonreye. Dins ç' cas la, is pôrént vleur fé li frambråylisse ; dj' ô bén, "regregnî" no payis walon el France. El tuzance walone sereut co pus mancî k' enute, avou ça. Ddja k' ès sitouwacion est må ahessî.
Dins cåzumint tos les familes politikes, on-z a sogne del foite droete. Gn a totplin d' råjhons. Nén dandjî d' fé ene lisse padzo, vos l' kinoxhoz azår ddja bén. Ces pårtis la adaweynut des vôteus timpesse dins bråmint des sadjus. Li Vlaams Belang est, asteure, li pus grand pårti, e Flande. Amon nos nonnreces vijhéns, li Rassemblement National ni shonne pus esse l' seu mouvmint. Gn a d' ôtes egzimpes e-n Urope. Li Walonreye est, disk' enute, l' seule foû-rîle.
Fåt-i vraiymint les ricrinde come li stoele a cawe ? Fåt-i porshuve a les tchessî evoye do debat ? Çki est l' adierça do nouzome cordon politike. Ci sistinme rola n' rote k' a mitan amon nozôtes. Tot rwaitant l' foite droete, ça rote. Tot rwaitant l' foite gåtche, foiravant avou l' PBB, ça n' rote ene miete moens. Li cordon politike, c' est cwè ? Ene eplåsse so ene djambe di bwès, ubén ene dierinne toursiveusté ? Ene ôte toursiveusté n' sereut nén d' acertiner k' les estremisses sont tos des recsisses, mins k' les ôtès djins del politike n' î sont nén. Paski, dji n' sai nén si vs l' av rimarké. Des lwès otoritaires timpesses årént stî prindowes dispoy l' moes d' måss 2020. Esse otoritaire n' sereut, kécfeye, nén ene piceure do recsisse ?
- Pårtimarionet : Voir l'article « Sire, li Beldjike vike core moens »
- Neyerlande : Pays-Bas
- Frambråylisse : Rattachisme
- Cordon politike : Cordon sanitaire