(Èl-Gueuye-Noere – 28inme) 19/12/2021
El sambresse, c' est on batea k' on voet sovint so les canås eyet les rivires. D' ayeur, èç mot rola vént di Sambe, k' est ene rivire ki passe dins Tchålerwè. Pocwè djåze-dju d' çoula ? Voeyoz, dji rwaite nosse pitite Walonreye come ene sambresse. Savoz, pindant ki dji scrî ces mwintès lenes ci, dji rlouke a onk di mes lives k' est ådzeu d' mi scriftôr. C' est on live neyerlandès-cåzant da Rob Heirbaut yet Hendrik Vos so l' Urope. El tite, c' est : "Europa in woelig water" ([WA] L' Urope est dins l' lavasse). Cist ovraedje cial cåze des rujhes timpesse ki l' Union a kinoxhou dins l' dijhnêye 2010. L' Urope, ci n' est nén ene sambresse. L' Urope, c' est puvite on pus grand batea, savoz.
Si l' Walonreye n' est nén dins l' lavasse, elle est bén dins d' l' aiwe foirt brune. Sins vleur esse måhonteu avou vozôtes, binamés lijheus ; dj' a les pinses k' el Walonreye est dins l' shitaedje. Elle est dins on bassén di stron bén likide. Do moens, likide disk' enute. Avou l' ivier, li sambresse Walonreye serè dandjreus ecepêye dins cisse brune aiwe rola avou li djalaedje. Dji vs pou dire k' s' i nd a del bijhe avou el pufkene di l' aiwe : vo nez va esse radmint ataké. Les djins didins sront les prumirès rascråwêyes. Li batea dvént d' pus e pus pôzetait, mes djins. Fåt dire k' les problinmes del boursete ni ns aide azår nén.
Totfeye, après l' ivier, c' est l' esté. Dji sai ki davance i gn aveut l' bontins etur zels, mins asteure cisse såjhon ci n' egziste pus vraiymint. Damadje, dj' el voeyeu voltî ! Årè e 2021, les dierins esté n' ont måy stî froed. Oufti ki nenni ! Des moes di djulete eyet d' awousse wice k' i fijheut des triyårds di degrés. Ki c' estaxhe a l' ouxh ubén a l' måjhone. Yeyet co ! Dji m' sovén d' on djoû viè l' fén do moes di fevrî 2019 wice k' el termomete ava crexhou disk' a vint-set degrés.
Si sol plan do climat, li sambresse Walonreye kinoxhe co deus såjhons ; virpus cwate sorlon les anêyes. Ci n' est nén l' minme des sakîs ki sont dzeu. Dins cisse societé rola, c' est todi l' ivier. Li captinne avou ses naivieus n' savnut nén cwè fé. Copurade, asteure, k' c' est co l' bocson sol navire Beldjike.
Comprindoz, c' est li djintrinnté ki kinoxhe dandjreus ès dierinne såjhon. Si ci n' est nén on microbe ki ns va axhorer, ci sereut nos biestrijhes eyet no manke d' accion ki l' vont fé. Tenawete, on-z a co ene miete di tins. Adon, vos ploz l' balziner evoye. Pindant l' ivier, gn a des djins ki voeynut voltî di rwaitî on laid fime di Noyé estazunyin. Pus, i gn a des sakîs k' inmnut mî s' retrôcler po schoûter des muzikes da Tchîkofski ubén do metal. Fåt bén sey dins l' tinme ! Vos ploz djåzer avou vosse famile yet vos soçons. Do moens, c' est todi lweyå. Oyida, ådzeu des rujhes di l' avni, on s' tape des lwès liberticides dispoy, bén rade, deus anêyes ! Padecô, i m' shonne foirt bén k' el parminêye å cronivirusse 2019 a des lardjès spales. On-z aveurirè comint ça va daler ces istweres rola. Dit-st i : plait-st a Diè !
- Sambresse : Péniche, *sambresse
- Dijhnêye : Voir l'article "Vint anêyes pierdowes"
- Tchîkofski : **Tchaïkovski
- Liberticide : Liberticide
- Aveur/awè des lardjès spales : Avoir bon dos
- *Ce substantif est le mot gagnant du concours de mots wallons à réintroduire dans le français de Belgique. C'est pourquoi, je vous encourage, chers lecteurs, à utiliser « sambresse » au lieu de « péniche », en français.
- **Cette ortographe a pour objectif de respecter la prononciation russe.