(Èl-Gueuye-Noere – 30inme) 06/02/2022
Asteure, l' estance economike di nosse redjon dvént todi dpus tintante eyet pôzetaite. C' est pé k' e Grece, roci ; dit-st i dins les gazetes. Fåt l' erconoxhe. Totfeye, ça n' a nén todi stî come çoula. El Waloneye ava lonmint stî ritche. Oyida k' tot n' ît nén tot bea. Oyida ki bråmint des djins estént pôves a l' epoke. Mins nerén, c' est avou nozôtes k' el Bedljike ava divnowe el deujhinme poûssance del Daegne, e 1880. Nos tayons n' ont nén dvou rastinde el colnijhaedje do Congo-Kinchassa po pleur basti l' payis. Adon, sayans d' leu rinde bon dvwer. Al plaece d' les rnoyî. Porshuvans leu loumiant ovraedje, tot amidrant leus flotches come el colnijhaedje.
Çki fåt sawè yet ritni, binamêyès djins. C' est k' el Waloneye, ele n' esta rén li 27 di setimbe 1830. Ele n' ava pont d' liårds. Elle esteut tot seule, avou les Flaminds, conte el Daegne. Cénk dijhnêyes après, ele ava tot adiercî. Nolu n' el ava aspalé, pindant. Savoz pocwè nosse redjon ava tot wangnî ? Mi, dj' el va vos dire. Tenawete, padvant, dji vs advierti ki dji va esse ene mitan crou dins m' pårlaedje. Voci el respondaedje al kesse. « El cok walon ava prindou ses coyes ey il les ava pôzer sol tåve. El cok walon, c' esta ene fire biesse. El cok walon, i vla mostrer a tertot k' on ptit pleut mwaistri. El cok walon, i vla eto avanci. Paski ses iys rwaitént viè l' avni. »
Dispu èm-n' nexhance, e 1999, disk' enute. Dj' a todi veyou no simbole subiter. On djoû, l' Ospice Sint-Djîle duvrè comprinde k' nosse nåcion doet saetchî s' plan. Dj' a les pinses k' el Flande nos n' va nén çansler disk' al fén des féns. Houte di çoula, dji croe k' po ça ; mwintès sakîs sont do bos k' on fwait les violes. Yeyet, dji lé sovint k' sacwants frambråylisses volnut k' on-z erale avou nos ancyins abrokeus. Dj' ô bén, li France. Çki Jules Gheude yet ses soçons roveynut bén, c' est k' les Walons n' sont nén francès. Cwand el Rassemblement Wallonie France s' aveut prezinté åzès votaedjes, e 2009. Ils avént fwait berwete. Di 2009 a 2011, c' esteut tolminme les anêyes ewou k' el Beldjike aveut bén manker d' schirer. Åzès dierins votaedjes, gn a partint troes ans, el Rassemblement Wallonie France n' a minme nén prindou pårt. Fåt nén dmander.
Pôreut vali k' les cis ki m' léjhnut dispu des moes et des ramoes savnut ki dji predixh l' fén del Beldjike po bénrade. C' est pocwè, nosse nåcion doet rloukî viè l' avni. Come ele l' fijheut, a stî on tins. Nos n' estans nén les seus ki vont, motoit, s' dislaxhî. Rwaitoz do costé del Scôsse ubén del Catalogne. Ouy, on voet eto l' minme sacwè avou les Serbes del Bosneye. Voeyoz, l' Urope va-st azår candjî cwek' i s' passe. Nozôtes, nos duvrans esse presse. Ça, les Flaminds l' ont bén comprindou. Nos vijhéns bijhreces s' avént bén apresté a l' atake del federalijhaedje do payis. Nozôtes, ns avans raté l' ocåzion.
L' av rimårké ? Dj' a sayî d' escrire ci tecse ci avou optimisse. Daloz, motoit, m' acertiner k' i n' est dandjreus nén possibe d' fé pé k' asteure. Vos serîz kécfeye dins l' bon. C' est come avou tot : metans ; el shijhinme distindaedje di masse, el pårminêye ey el après-cronivirûsse. Tot dpind d' çou ki ns dalans foirdjî.
- Dijhnêye : Voir l'article "Vint anêyes pierdowes"
- Frambråylisse : Voir l'article "Ké-n afwaire ! [2inme boket]"
- Shijhinme distindaedje di masse : Voir l'article "Pocwè sacwants volnut l' pea des politikîs ?"