(Èl-Gueuye-Noere – 31inme) 05/03/2022
Dvant d' ataker el lijhaedje, vos dvoz sawè ki dji n' so nén crustin. Come di djusse, dji so èn ateyisse. Dj' ô bén ki dji mescroe. Mins nerén, dji so ki riscrî li prumire lete da sint På åzès djins d' Corinte e rfondou. Djans ; pitchote a midjote. Savoz, el tins mi manke bén. Nén åjhey d' sawè respecter ses egadjmints. Po rivni a nos afwaires. Dins l' dijhinme pårtêye d' cisse lete la, al catoizinme lene, on-z ertrove : « [...] mes binamés, petez evoye des idoles ». S' i gn a ene sacwè avou l' ci ki dji so d' acoird. C' est bén cisse-la. Savoz, På m' shonne ledjirmint intolerant. Copuvite avou les Djwifs eyet les payins. Dj' a les pinses k' les nouzomès « idoles » sont les djos des payins. Dji n' so nén seur. Adon, a-z aveuri. Asteure, les idoles n' serént pus les djos payins. Ci serént purade des sakîs k' egzistêynut bén. Gn a bråmint ki nos prometnut todi mirabiliå.
Nos n' estans pus dins l' dijhnêye 1990, ewou tot daléve bén po nozôtes. Dj' ô bén : do costé del Waloneye. Do moens, c' est çki dji croe. Li Froede Guere ît dirî l' Daegne. Li shijhinme distindaedje di masse esteut co lon dvant. Nonna k' tot n' esteut nén tot bea ttavå. Rwaitoz avou l' guere e Yougoslaveye, k' ît dvinltins on payis des Balkans. Adonpwis, les anêyes 2000 ont shuvou. C' esteut li prumî côp k' el Coûtchant esteut ataké pa ene sôre di terorisse daegnrece. Avou ça, k' al fén d' cisse dijhnêye, on-z a cnoxhou ene crijhe economike. A l' atake des anêyes 2010, tot s' a apåjhî ene miete. Totfeye, l' estance do monde coûtchantrece s' a co dicwelixhé avou les shuvantès anêyes. On-z a co cnoxhou ene sôre di terorisse daegnrece. Ci côp la, gn aveut bråmint pus d' atacaedjes, copuvite amon nozôtes. Il a fwait d' pus e pus douf pindant des ans yet des razans. Les candjmints climatikes n' sont k' li prumire etape viè « vs savoz bén cwè ». Ouy, i nos shonne k' el pårminêye est ki disparexhe. Dijhans todi kécfeye !
Dvant k' cist etrevén ci soeye podbon do passé ; dj' inmreu bén vs rimimbrer åk. Ni rovyîz nén k' des idoles ont ponou des mzeures recsisses. Çki dmore fén dandjreus po nosse societé. Les cis k' oizént rouscayî sol voye estént sovint calindjîs. Poreut vali k' ça n' ercomince nén, copuvite après troes eploctaedjes.
C' est ces minmès idoles rola ki polnut må d' nos moenner al fén des féns. C' est ossu yeusses ki voeynut voltî d' copårtî li djintrinnté e deus : avou les vayants d' on costé eyet les mwais d' èn ôte. Tofer ces idoles rola ki vs dimandnut bén d' les schoûter eyet vos leyî adire. Leu manikeyisse n' a pont di frontire. Leu propagande dimore a leu imådje. Des baltreyes ki sont : grandiveuses, måhaiteyes eyet foû del råjhon. Is rivnront totplin des côps vs fé des pretchi-pretchas avou l' manire el pus rinflêye possibe.
- Dijhnêye : Voir l'article "Vint anêyes pierdowes"
- Shijhinme distindaedje di masse : Voir l'article "Pocwè sacwants volnut l' pea des politikîs ?"
- Manikeyisse : Voir l'article "Les djins mårtchnut so leus tiesses"