(Èl-Gueuye-Noere – 33inme) 15/04/2022
Onk di mes soçons, c' est on drole di cofinea ! C' est ene sakî ki croet voltî åzès complots. Savoz, totes les biestreyes. Gn a ene k' acertine k' el Daegne est rectingue, ey adon k' ci n' est nén ene bole. Gn a ene ôte ki boute k' les eploctas ont stî fwaits po nos tni a gougne. Cisse-la, elle årè fwait do brut timpesse. Dj' a rçou mes troes eploctas eyet tot va bén, disk' asteure. Houte di çoula, èm soçon rola m' a conté on novea complot. Èç complot ci est mo ahessûle po mi, veyånmint k' ça rwaite nosse Waloneye.
I m' a stitchî k' el Waloneye est viernêye pa èn ôte payis. Çoula ; dit-st i ; dispu l' dislaxhaedje del Beldjike. Fåt sawè k' el Beldjike, c' est tolminme on vî payis. Dj' ô bén pus ancyin k' l' Almagne, l' Itåleye, li Norvedje, li Russêye, et tchik et tchak. Adonpwis, comint l' Beldjike pout esse manaedjeye pa ene ôte nåcion ? A m' sovnance, i m' shonne k' on-z a shijh govienmints.
C' est a ç' moumint la k' i m' dit foû k' les Walons cnoxhnut mî les tuzances etrindjires k' el ci da yeusses. Ça, c' est puvite el veur. Schoûtez don l' radio. Gn a k' des tchansons francès-cåzantes, virpus francesses, eyet des tchansons do monde inglès-cåzant. Avou ça k' on-z a l' minme avou les fouytons eyet les fimes al tévé. Fåt ricnoxhe tenawete k' po les sacwès inglès-cåzantes, ça shonne esse come çoula tocosté. Metans, vos ploz ôre des tchansons inglès-cåzantes foirt peupreces dins on ståde di froede-ziyete, el Rûsseye. Mins nerén, si èn Estazunyin vout schoûter ene muzike rûsse-cåzante, i doet catchî après so les fis. Totfeye, rwaitant les tchôzes francès-cåzantes, c' est målåjhey d' e trover dins on payis ewou les dmorants ni djåznut nén èç lingaedje la. Si on s' lait adire pa m' soçon, on cminçreut a sondjî k' el tuzance paridjote est ki ns abroker. Dj' a såyî d' lu fé etinde k' i duvreut daler vir on medcén. Les complots, ci n' est nén bén.
Après, i m' acsegne k' les Walons djåznut on lingaedje ki n' est nén da yeusses. Savoz, bråmint d' payis amerikins ont des lingaedjes uropeyins come lingaedjes oficirs. Rwaitîz les Estats-Unis. Ci n' est nén paski l' inglès est, de facto, li lingaedje oficir des Estazunyins k' is sont elaxhîs å Rweyåme-Uni. Epwis, dji n' pinse nén k' les pidjons ont tacsé el lingaedje da Shakespeare. Di no costé, c' est l' peupe walon k' a tchoezi el lingaedje da Molière. Come di djusse, c' est nén ene troke sociåle ey economike des djins ritches k' a oblidjî les ôtes a cåzer li francès.
Djans ; dji n' vos a nén dné l' no d' èm soçon. Dj' a les pinses ddja k' i n' sereut nén pår d' acoird po vir s' no uzé roci. Minme si po mi, ça n' candje rén. Nos camaerådes vont l' rimete, al fén des féns. Pôreut vali k' i n' va nén s' måvler po ça. Al copete do mårtchî, i m' shonne ki nos camaerådes ni cåznut nén l' walon. Po-z esse oniesse, i gn a deus-troes djins k' i l' polnut lére yet c' est tot. D' ayeur, tot scrijhant l' årtike, dj' a discovri comint lu spotchî : drole di cofinea. Ene miete lon, mins bon...
- Froede-ziyete : Hockey sur glace