(Pol MANIPRÉ – 1î) 09/04/2022
Ces djoûs ci, avou les eleccions e France, on cåze sovint do fachisse ki pôreut rivni dins nos payis. Sapinse sacwantès djins, nos vicréns on timps ki rshonnreut ls anêyes 1930... Mi, dji m’ dimande çou k’ ça vôreut dire po les waloneus : nos savans k’ e 1930, i gn aveut des loyéns etur puzieurs scrijheus et l’ pårti recsisse. Nén etonant paski l’ foite droete, ele flate sovint l’ culteure do payis ou do vî timps. C’ est po ça ki cwand ele n’ est nén adjinçnêye e parti, on l’ lome eto l’ « mouvmint idintitaire ».
Ciste idêye la ki l’ fachisse pôreut s' siervi d’ nosse eritance po sayî d’ divni pus foirt, c’ est ene sacwè k' sacwants tuzeus ont ddja sondjî. I gn a waire di timps, puzieurès gazetes sol foclore ont decidé k’ elle estént responsåves di nén s’ ritrover maxheye avou ciste tuzance la. Elle ont scrît e totès letes k’ ele sont des gazetes antifachisses. Dins li prumî limero di Hellebore (octôbe 2019), li scrijheu inglès David Southwell scrît : « Li payizaedje est politike [...] Les cis k’ inmnut l’ foclore savnut k’ il est todi pus eployî come ene åre po fé avancî des fås aeuras di meyeusté culturele ou d’ raece ; il lyi voeynut cåzu nén comifåt so des banires di hinne et d’ nåcionalisse, radicalisse et otoritaire. » Çou k' est scrît dins ç’-t årtike la, c’ est l’ contribouwaedje da Hellebore al rezistance, nos dit l’ cene ki sine l’ editoriå...
Del minme manire, po prezinter l’ gazete Sornettes ki va rexhe bénrade, on responsåve sicrît : « Paski l’ foclore do payis est sovint pris come escuze po vanter des valeurs idintitaires et stroetes d’ idêyes [...] i m’ shonne impôrtant d’ dire ki ç’ gazete ci est antifachisse, anti-idintitaire et pudrè foirt asteme ås tuzances redjonalisses et tradicionalisses. » On direut bén k’ c’ est on novia uzaedje, sortot mon les soces di djonnès djins. Kécfeye minme ki, s' i fåreut scrire ouy on manifesse pol culteure walone, bråmint des waloneus dmandrént k’ on direut tot parey dês li prumî årtike.
Vos diroz kécfeye ki, tot ça, c’ est des barbôjhes ; ki l’ pupårt des djins n’ pinsnut nén insi. Dji n’ sai nén. Cès djoûs ci, a Nameur, dj’ a veu des plake-tot-seus avou l’ messaedje « Firs d’ esse antifachisses » (scrît e walon) — et l’ dessén c’ est l’ Cok Walon avou troes traits al plaece di s’ sporon. Ci simbole la des troes traits, il a sti edvinté e 1932 et i vou dire k’ on-z est conte les fachisses, les stalinisses et les wårdiveus (oubén les capitalisses, i gn a deus diferintès esplikêyes). C’ est tot on pordjet, saiss ! Mins, a ç' k' on pout vey, i gn a ddja des waloneus pol disfinde...