(Èl-Gueuye-Noere – 36inme) 21/07/2022
Asteure, c' est les vacances d' esté. Bråmint des djins volnut peter evoye foû del Beldjike. C' est comprindåve avou l' parminêye. On-z a tolminme stî seré al måjhone pindant deus anêyes. Al fén, on comince a end awè s' sô. D' ayeur, sacwantès sakîs ont platezak tourné sot. Les canaris ont bén stî metous dins des ptitès gayoles. Pôreut vali k' elles ont stî beles po tertot.
C' est målåjhey di prinde l' areyoplane avou les greves k' i gn a. Avou ça k' i gn a d' moens e moens d' bouteus dins l' aviåcion. Mins nerén, les voyaedjeus sont bén la a rastinde. Foû d' ces problinmes la, l' areyoplane, c' est eto ene mwaijhe sacwè po nosse nateure eyet l' Daegne. Adon, pocwè prinde l' areyoplane ? On pout ossu prinde el trén ubén s' mete e-n erote avou ene oto. Po les cis k' i n' ont pont d' liårds, come mi, on pout todi daler discovri des edroets el Waloneye ubén dins ene ôte sadju d' el Beldjike. Savoz : li Beldjike c' est on ptit payis avou totplin d' payizaedjes diferins. Gn a des edroets ewou k' c' est todi l' minme : metans, el Coisse del Mîtrinne Mer e Spagne. C' est tofer des truks a tourisses. Ki ci soeye el Catalogne ubén a Torrevieja, seules deus tchôzes candjnut vraiymint. Dj' ô bén : les pris eyet l' timperateure.
On-z ôt dijh moes so doze k' i gn a rén el Beldjike. Fåt sawè k' i gn a do monde ki va sovint al Coisse flaminde ubén dins li Lussimbork walon : dj' ô bén li province. Ns avans eto des belès veyes k' on pout daler vir. Dji n' va nén citer Tchålerwè. Vs comprindroz bén pocwè, pinse-dju. Poirtant, des veyes sont sifwaites a rôbaler foû dins ç' payis ci.
Al Nonne, on-z a Mont k' est ene ptite veye foirt tuzançrece. Djusse : prindoz asteme a nén daler al ståcion di trén rola. Come d' efet, vos pôrîz må di tchaire moirt dvant. Tot dmorant dins l' Hinnot walon, Tornè, c' est on clapant edroet. Copurade po les crustins avou ses eglijhes eyet s' catedråle. Di l' ôte costé do payis do cok, on-z ertrove li cråne Gåme. La, ewou k' i gn a on lingaedje ki dji vôreu bén aprinde. Sapinse a m' mami, onk des viyaedjes drola a l' minme climat k' e Provence. Dj' a målureuzmint rovyî l' no d' èç sadju cial.
Al Bijhe, dji vs conseye grandmint daler a Anverse. Seule rujhe : i fåt kékes djoûs po sawè tot fé drola. Po les pus vayants ey azår les pus djonnes, gn a Geraardsbergen. C' est ene ptite veye djondante d' Ate, al frontire avou l' Hinnot. Gn a des parks, mins gn a eto ene fameuse tiene a monter a pî. Houte di çoula, dji n' a måy co stî, mins dj' a oyou des felès dijhêyes so Gant. Adon, dji m' agranci d' el viziter. Al copete do mårtchî, dji cnoxhe des djins k' avént stî binåjhes d' awè stî a Malene. Ene sadju a-z ahouwer ås payis do Noer Liyon, c' est bén Brudje. C' est mo djoli, dji n' va nén scrire l' contråve. Totfeye, gn a trop des djins. El dierin côp ki dj' a stî rola, c' esteut nén foirt åjhey d' mouwer on doet.
El lisse n' est nén complete, mins ci n' est nén comifåt d' fé on lon tecse po ça. Vs avoz ddja mwintès idêyes. Asteure, vos ploz eto atåvler des edroets ki dji n' a nén mincioné dins cist årtike ci. Çk' i mi freut pår plaijhî. Dji so on djonne ome k' est foirt curieus, savoz.