(Èl-Gueuye-Noere – 45inme) 25/01/2023
C' est ene novele anêye ki comince. Ki ciste anêye ci soeye boune po tertos eyet tertotes. Dji di ça, mins vla k' on-z est bén rade å moes di fevrî. 2022 n' a nén stî l' meyeuse, mins on-z el a sorviké påjhûlmint. Dji saye ene novele « cronike » ki s' lome « cronike des såjhons ». L' adierça, c' est d' escrire èn årtike tos les trimesses sol såjhon do moumint. Asteure, nos estans todi e-n ivier. Adon, vs av bén adviné, ene miete, el sudjet d' èç tecse ci. Come di djusse, tot rwaitant l' tite, dji va dvizer di l' ivier 2010-2011. Dj' aveu yeu doze ans. El Waloneye, leye, elle aveut yeu des moes målåjheys avou l' nive, li froedeur di tchén ey el noere glaece. Po-z esse oniesse, mes djins, dj' aveu vraiymint veyou voltî èç tins la.
Aprume, gn aveut ene airance speciåle. Dji n' a djamåy savou cmint atourner èç sintimint ci. L' ouxh aveut si blanc paltot so lu. Li froedeur di tchén do moumint vos fijheut bén comprinde ki vos vikîz. Sacwants avént eto comprindou k' ils estént e souke. Dj' ô bén : k' ils avént yeu bråmint d' må a sopoirter l' meteyo. Gn a rén avou ça, savoz. Èm-minme, dj' a sofri pindant l' dierin esté. Po rivni a ç' ki nos rwaite metnant. Dji m' sovén k' el blanc paltot ît eclairé avou les djaenès loumires des voyes. Ouy, s' i dveut co nivter, el paltot sreut eclairé avou des blankes. Ça freut puvite colidôr d' ospitå ; mins bon, ki vloz ? Dji di ça, cwek' ouy les lampes sont afeye disloumêyes tins del nute.
C' esteut l' dierin ivier ki dj' a passé dins l' måjhone, ewou dj' a viké tins d' èm-n' efance. Oyida, dj' a bagué å moes d' nôvimbe 2011, mins dj' a todi dmoré dins l' Noer Payis. Ké disbåtchmint d' peter evoye di drola. Dji m' sovén co bén do grand corti avou l' hôt sapén. Tot esteut blanc. Ene grande pekêye di djins voeynut voltî les monts avou del nive. Tolminme, mi, dj' inme mî on payizaedje banå rascovri d' ene si télmint nozêye cazake. Vir l' coeyeur vierner ci monde diloujhant. El coetisté rafroedixheut les rujhes eyet ritchåféve nos cours. Do moens, les cis des djonnes di l' epoke. Mi vla ki dji vos dvize d' on tins k' les moens d' dijh ans n' avént nén cnoxhou. Pôreut vali k' el nive nos rvént dire bondjoû, on côp. Tenawete, dj' a les pinses k' on-z a må tcheu avou ça.
A l' atake do moes di fevrî 2011, dj' a stî avou l' escole el Savoye. Savoz, cwand on-z est e shijhinme primaire, on va fé do ski. Ça a duré cwénze djoûs. C' esteut puvite bén, mins dj' a stî foiravant binåjhe d' ertouner a m' payis. Dji n' a rén conte el Savoye. Fé do ski, ci n' est dazår nén po mi. Pwis, cwand dji vizite ene sadju, dj' a todi mî inmé di tchoezi ewou dji va. Ça, c' est podbon on bea costé d' awè divnou èn adule. On-z est pus libe.
- Banå : Urbain