(Èl-Gueuye-Noere – 39inme) 19/09/2022
No bea lingaedje, el walon, est ki discrexhe. Les tuzeus vegnnut a manker. C' est l' veur, l' estance do walon dmore purade pôzetaite. C' est l' vicance. Ki vloz fé a ça ? Ki savans nos fé a ça ? Çoula ni m' espaitche nén di disfinde ci noûzome boket d' nosse tuzance. On-z est, tolminme, ene pekêye a såyî d' el fé viker. Mins nerén, dj' a avizé k' i gn aveut sacwantès diferinces etur nozôtes : les walon-cåzants. Copuvite tot rwaitant les manires di tuzer. I nd a troes.
Dji n' vos va nén les citer dins on ptit årtike k' a etur cénk cints eyet shijh cints mots. Pocwè nén, dalez mi dmander ? Paski dji duvreu ddja scrire on tecse tot passant les meyes mots. Onk d' mes adierças d' gaztî, c' est foiravant di n' esse nén foirt lon, mins d' aler droet-å-såme. Houte di çoula, ci sreut mo soyant po mi a scrire, mins tot ossu edoirmant po vozôtes a lére. Ça dmore ene teyoreye. Adon, i s' pout ki dji mete so papî on grand råjhonmint. Si dj' el vôreu bén, dji vs såreu toirtchî on live dzeu. Totfeye, po-z esse podbon oniesse avou vos, dji n' pinse nén ki dj' end euxhe dandjî. Fåt ki dji trove ene ôte môde d' adji.
Dji vs doe bén dire k' èm teyoreye n' est dazår nén pardiu. Ene troke d' mes lijheus sront, dazår, nén d' acoird avou mi. Èm teyoreye n' pout, come di djusse, nén esse totafwaitmint sifwaite. C' est po ça ki ci sreut mo ahessûle d' riçure sacwants ritripaedjes. Ça m' dinrè bén on côp d' aspale, savoz. Dvant çoula, i fåt co ki dji vs mostere mes abayeyes. Pôreut vali k' eles fouxhnuxhe comprindåves po cåzumint tertot, sortot på linwinceus fén cnoxheus d' no lingaedje. Vacobén k' amon nozôtes, on-z end a ene triclêye. Is savnut, shuvanmint, m' aidî avou mes abayeyes. Po dire el veur, dji m' atén kécfeye a mwintès rdites. Savoz, l' ci ki n' riske rén, ni fwait måy rén.
Dj' a les pinses ki dji va fé ene videyo so ci sudjet ci. Ci srè vraiymint pus åjhey po bén mete mes idêyes so pî. Al copete do mårtchî, ci n' serè nén målåjhey po vos a m' diner vos rispitaedjes. Ci n' serè nén li prumî côp ki dji frè ene videyo. Dj' end aveu ddja fé onk k' esteut ene bate di dvizes so les deus grands sistinmes ortografikes do walon. Dji vs doe advizer k' i ça m' va motoit mi prinde ene miete do tins. C' est on truk ki dji doe apontyî comifåt, veyanmint k' i dmore on betch spepieus.
Tot scrijhant d' videyo, dji sondje dispu lanawaire a fé ene sôre di responda. Po ça, vos mi ploz emiler vos kesses eyet dji va såyî d' responde a totes les dmandes interessantes. Dj' ô bén : rén so m' vicåreye foû d'Èl-Gueuye-Noere eyet nén des fafloûtes, s' i vos plait bén. Asteure, cisse dierinne sacwè ni dmane k' on pordjet k' est sol costé. I s' pout ki dji m' va ratuzer pus tård.
- Droet-å-såme : Droit au but