(Èl-Gueuye-Noere – 44inme) 29/12/2022
El sinse des prumistés, c' est ene sacwè ki dpind des djins. On ni fwait k' rivni al kesse des coleurs yet des gosses. On-z î rivénrè sovint, savoz. Tolminme, i fåt ricnoxhe ki mwintès sacwès dmeurnut pus impôrtantes, virpus pus strapantes. C' est l' veur ki nos n' avans dazår nén l' minme definicion po les prumistés. Dj' el rimårke dins des dominnes timpesse : les medias ; li scolaedje ; el societé et tchik et tchak.
Asteure, i fåt todi prinde asteme a ç' k' on fwait. Tot pout esse ene afwaire di margaye mediatike. Po rwalnijhî on mot do lingaedje da Molière, on cåze di polemike. Les medias l' ont tourné e-n ene syince. Ça a divnou foirt åjhey d' tot spepyî. Fåt l' erconoxhe : chipoter so ké sudjet dene pus d' ovraedje po les gaztîs. Fåt bén wangnî s' cwénzinne, dit-st i l' fô. El cope daegnrece di fotbale årè stî on bel egzimpe d' margayes. Ça a comincî avou l' bire. Ça a porshuvou avou ene ôte sacwè. Al fén des féns, on saveut biesmint end awè s' sô. Ces djins la avént moens rouscayî pindant les tournoes dvant l' ci d' fotbale. Cwek k' ça s' a passé dins l' minme payis, savoz. Avou ça k' asteure les spôrts divegnnut el fiestival des pårlumintîs. Po mwintès sakîs, les votaedjes ont deus ans d' avance. Prindoz pacyince !
Ouy, nos avans l' internete k' est mo ahessûle dins nos vicåreyes. Gn a des djins k' ont po mestî d' ovrer so les waibes. Inte di yeusses, on-z ertrove les cis ki fijhnut del contnince. On les voeynut so les rantoeles di soçnaedje u co so les waibes a videyos. Les contninces sont, come di djusse, pår varyî. On pout tchaire so des truks ahessants. Kécfeye, ça dvize del syince, des lingaedjes et vos nd åroz. Télcô, målureuzmint, on tchait so des biestreyes. Metans, les femes ey omes ki sont dins des fouytons d' tévévicance. Noûv côps so dijh, cwand vs daloz vir leus paedjes, vos waguez so des riclames. El rindaedje cotuzeu d' les rwaitîs est co pus vude ki l' univiers. Fåt nén dmander ! Tenawete, i sont rwaitîs tot-z estant « impôrtants ». C' est dinsi. Ki vloz fé a ça ?
Dins cist hagnon ci, on va rloukî do costé des scoles. Tins d' mes sgondaires, dj' esteu e djeneråle. Dji pinse k' nos tayons lomént çoula puvite : les umanités. Li djeneråle, c' est po daler a l' univiersité ubén a l' hôte-escole. Dj' end a golafé des cayets. Mins nerén, dj' a radmint rovyî bråmint d' matires. Ni vnoz nén mi dmander d' vos carculer del trigonometreye. Po les pus simpès tchôzes d' èç luçon cial, ça va co. Totfeye, po les pus målåjheyes ; dji n' so nén sûti po çoula. Adon ki, minme e-z estant todi a scole, dji n' î comprindeu rén. Po-z esse oniesse avou vozôtes, binamêyès djins. Dji voeyeu evi les matematikes. Dji croeyeu k' ça n' aléve djamåy m' siervi. Enute, dj' a les pinses ki dj' el saveu todi mî k' mes scoleus. Ça n' dimore k' èn egzimpe. Asteme ki des bouteus ont dandjî des matematikes. Ça dji n' el roveye nén. On-z a mezåjhe des matematicyins. Po m' veye, mågré tot, les matematikes n' mi sievnut a rén.
Motoit bén k' on divreut acsegnî åzès scolîs des sacwès ki dimannut des gros nuks pol vicance. Metans, rén k' des competinces soûmintreces : awè del fiyate a lu-minme ; manaedjî ses transixhances ; sawè fé avou s' boursete ; et patati et patata. C' est todi pus ahessûle k' les pîces da Molière u da Racine scrîtes dins on vî cronoleke nén comprindåve. Houte di çoula, k' is n' ont nou loyén avou nosse bele coigne di Daegne. Avou ça k' les dicipes n' sont nén aidîs på acsegneus.
1. Virpus : Voire
2. Media : Média (si l'on suit le système français du nombre), medium (si l'on suit le système latin.
3. Tévévicance : Télé-réalité