(Èl-Gueuye-Noere – 43inme) 02/12/2022
On tchanteu walon-cåzant ki dj' aschoûte voltî, c' est bén William Dunker. Cist ome ci, c' est ene sakî ki vike do costé do Noer Payis. Il a rexhou troes plakes d' albom inte 1997 eyet 2007. Ses muzikes sont, å pus sovint, avou des tecses sicrîts pa André Gauditiaubois. El tite d' ene d' ses tchansons, c' est, tot riprindant l' ortografeye d' oridjene : L'airdiè spitra. Co on côp, on n' va nén cåzer del parole. Tolminme, gn åreut sacwantès belès sacwès a håyner.
Ci n' est nén a l' atake do moes di decimbe k' on voet des airdiès ttavå. Dazår ki c' est on fenominne meteroyolodjike k' on sait télfeye vir. Les djins s' anoynut nén do stofant esté k' on-z a cnoxhou, mins ça leu freut grandmint plaijhi d' awè do solea dins leus vicåreyes. Les cis d' inte di vozôtes ki m' conoxhnut bén sepnut mes avuzions so les noveles d' ouy. Infén, on-z a cnoxhou bén pé pindant les moes d' decimbes des deus dierinnès anêyes. Dijhans todi kécfeye k' el diåle ni ns apice nén co on côp. Mins nerén, dj' a les pinses k' el parminêye a bén peté evoye d' no payis. D' èç costé ci, les nûlêyes ont vindou leus plaeces al rayêye.
Pôreut vali k' les djonnes euxhnuxhe des bistokes a Sint-Nicolai ey å Pere Noyé. Po çoula, is doevnut esse djintis. La eto, dijhans todi kécfeye k' les parints ont les liårds ki vont avou. Dit-st i m' pa, tins d' ès vicance : « Sint-Nicolai, mes ptits efants // C' est vos popas, c' est vos momans // Si vos popas ni boutnut nén // Sint-Nicolai n' passrè nén ». Djans, dji croe k' les picrons d' asteure sont-st ene miete pus sutîs sol sudjet. Foû des bistokes, les familes polnut s' rashonner. Ki ci soeye tins des fiesses ubén a èn ôte moumint. A stou on tins, li liberté d' ès rashonner n' egzistéve nén. Come di djusse, des djindåres vinént a vos måjhones. Vacobén k' el Deujhinme guere daegnrece est fineye dispu lonmint. Cweki des roedès otocraceyes avént sorviké disk' al dijhnêye 1980, e-n Urope.
Tertot pôrè s' rashonner dvant on feu di tchminêye, u co al nouzome tåve del såle a mindjî. Savoz, ci meube ci k' on n' pout djamåy djonde, foiravant avou ses doets. El tåve ki dmore drola po meubler. Po les cis ki n' ont pont di tchminêye, is polnut todi daler å Katar u rastinde el fén di l' ivier. Mins nerén, i fåt ossu rashir k' on-z a di l' amindjî. Nos restans dins on trevén ewou il a divnou ene syince di sawè s' rafôrer. Mi ki pinséve voltî ki cisse rujhe ci aveut disparexhou al fén del crijhe k' a-z ataké e 2008. Mi vla yeu.
Infén, dji scrî cist hagnon ci po vs bediver on bea moes di decimbe. Dji n' va nén dire on bea Sint-Nicolai ey on bea Noyé. Come di djusse, el Waloneye, taiss k' istoricmint crustinne, est, dispu on tins, neute. Houte di çoula, dji mescroe. Dj' åreu bén veyou voltî d' vos sohaitî ene bele novele aneye, mins dji va rastinde. Fåt dmaner afeye saedje, savoz.
- Otocraceye : Autocratie