(Èl-Gueuye-Noere – 42inme) 15/11/2022
Dj' a ritrové, tins d' mes lijhaedjes, ene fråzlete filozofike. Ele n' est nén da mi. Dj' a les pinses k' on pout tuzer so cisse fråzlete ci. Ele vént, come di djusse, d' on limero d' ene gazete bedje k' a rexhou enawaire. Ça a stî acertiné pa ene sakî foirt peuprece do payis a des studiants. Li pårlaedje d' cisse grande djin la, c' esteut : « on roed tchîf aflåwi el societé ». Putete n' estoz-vs nén d' acoird avou ça. Mins nerén, vos vs dalez dandjreus ravizer.
Ci persounaedje ci nos fwait voltî pinser al Russêye. Après awè aveuri les nombes, ci payis ci a ene poûssance ene miete pus grande k' el ci do Benelusse. Ci payis d' Urope levantrece, c' est aviè 140 miyons di dmorants conte cåzumint 30 pol redjon d' Urope coûtchantrece. Totfeye, i n' fåt nén rovyî ki Poutine aveut riprindou on payis dins ene estance pus pôzetaite. Djans : c' esteut l' fén di l' U.R.S.S. ey Eltsine n' aveut nén manaedjî s' payis comifåt. Pwis, les liårds n' font nén tot. C' est målåjhey d' ès disfinde d' ene bombe nawearinne avou des biyets. Houte di çoula, on n' sait nén mindjî les manoyes, contråvmint åzès dveres.
El manire avou l' ci k' el fråzlete est fwaite dimore ahessûle. El sakî ki l' a dit åreut disfwait voltî li blouke. Dj' ô bén, k' cisse djin ci ni si rwaitreut nén come ene roede moenneuse. Motoit bén k' ele sait k' ene tote pitite troke des Bedjes lu xhene avou plaijhî. Ni fåt kécfeye nén rovyî k' el madjorité des Bedjes l' ont sopoirté. Dayeur, ouy, bråmint li sotént co. Tenawete, ene pitite pekêye do peupe voeyént purade evi ès-n' alure d' hanzineuse dins ses cåzaedjes. Copurade pindant les disbåtcheyès moumints k' a cnoxhou li payis da Flupe. Poirtant, tot rwaitant a ça, ele n' fijheut nén daler d' pé a pé l' efouwaedje peuprece. Do costé eternacionå, cisse nouzôme kékene ci n' shonneut nén vleur s' mostrer. Mwincô k' ele åreut bén vlou ni nén fé do ramdam po rén, come Joe Biden asteure. Ça vout dire : ene sôre di sôbristé, al môde da Jozef de Vuster. Al copete do mårtchî, elle est todi droci po ns consyî avou les diferintès crijhes. C' est djoli da leye : gråces traze côps.
Li djin k' a prononcî li fråzlete shonne aprume mo amiståve. El peupe rimårkéve voltî si prezince ey ès enondansté. C' est po ça k' les Bedjes l' inméve. C' est ene betch po leye ki l' Urope s' e va disfinde nos valeurs. Poutine a dazår les bombes, mins l' Urope a d' ôtès sacwès. L' Urope a ene democraceye sins rujhe, ene manoye ki crexhe d' pus e pus ey ene peuplåcion k' est ki s' astoke. Les Estats-Unis sont d' no costé po ns aspaler. Sins rovyî eto l' pus impôrtant : el poûssaedje di l' Oucrinne eyet, puvite, d' ès prezidint. Ci comike ci, c' est on nouzôme umanisse ki sondje advitam a waeranti l' monde di Poutine.
Ci dierin n' est pus riscant po tertot, a cåze di l' enondansté d' ès copleu oucrinnwès. Si e cas, Vladimir n' a pont d' sopoirtaedje d' on payis k' a d' l' aschoûte. Les penitinces economikes do monde coûtchantrece a l' ancyinne republike sovietike espotche li Kremlin. Ki va fé ? Il est dins l' berdouye. El Moscoveye doet candjî s' manire di roter. Si l' « roed moenneu » do Kremlin n' est nén distrôné pa nozôtes, c' est s' peupe ki l' va schover evoye sins tchicter. El mitan del dijhnêye 1940 est ki s' ridit.