(Èl-Gueuye-Noere – 7inme) 10/11/2020
Vos n' avoz nén veyou del nive, ubén des timperateures dzo zero, mins vos avoz d'dja veyou des longues nutes. Houte di çoula, l' kibéntinme del tuzance walone est bén froed. L' pus bele cogne daegnrece divént ene aite wice li vicance disparexhe, tos les djoûs sins nole ahote.
Li tuzance del Walonreye est e dierinne faze d' on crantche djenerålizé. Les lingaedjes del Walonreye, ki sont les peumons, ressnut ossu marådieye ki les moxhe-d'-apîs. "Nos n' dalans nén nos plinde" dit-st-i yet dit-st-ele, minme si l' walon, l' picård, li lorin (avou ès diyaleke : li gåmès) eyet l' tchampnwès ont stî cåzumint dizindjnés, i nos resse co li francès, li lingaedje da Molière. Li francès ki dmane eto li lingaedje d' nos ancyins colons, li lingaedje d' Île-de-France eyet del redjon åtou d' Orléyan k' el bordjoezreye bedje, ossu bén francès- ki neyerlandès-cåzante, nos aveut tacsé å 18inme sieke, li lingaedje avou li ci k' Paris porshuve d' awè ès poûssance sol Nonne-Beldjike ey e Brussele. Cisse lingaedje avou brånmint d' rujhes yet di grandiveusté evier les-ôtes lingaedjes d' oyi, evier les lingaedjes d'oc ey evier les lingaedjes francoprovincås.
Li tuzance del Walonreye est co e dierinne faze d' on crantche djenerålizé, li cour a stî toutchî. Les årtisses walons eyet walones n' riçuvnut nén d' merite, infén ecsepté s' is rixhinut li pop-tuzance-daegnrece come dins l' muzike avou des tchansons les pus insipides les enes padri les-ôtes. Po les fimes, les fouytons, obén d' ôtes ouves del odiovuzion, les tchinnes di tévé prefere k' vos rwaitîz des naveas francès u core estazunyins. Nos vicans so ene bole wice el cwantité prumixh sol cwålité. "Si tertos l' fwait, çoula est l' werit-tot", dit-st-i yet dit-st-ele sol cogne d' èn erfrin.
Li tuzance del Walonreye est todi e dierinne faze d' on crantche djenerålizé, li branete est fotowe, li tuzance del Walonreye nos fwait ene djaenisse. L' acseignmint del Federåcion Walonreye-Brussele acsegne a mitan a ses scolîs eyet scolresses l' istwere del Walonreye. På egzimpe e-n istwere, on nos djåze des Gålwès, des Romins et tchik et tchak, mins on nos djåze nén del Principåte di Lidje, k' esteut li Walonreye d'avance, li Walonreye do Moyinådje yet do Modiene-tins. Nenni, yeyet di pus, on nos acertine implicitmint k' el Walonreye est ci k' elle est asteure gråce a nos ancyins colons francès avou leu revintaedje di 1789. Dji vou bén k' ç' esteut impôrtant a ç' tins rola. Tenawete, l' revintaedje di 1789 n' a pus enute pont d' poûssance sol societé walone, contråvmint sol societé francesse.
Nos avéns todi oyou des djins come : Molière, Racine, Voltaire, Hugo, Zola, Maupassant, Camus, ... Ki, inte tos les Walons, avént oyou des nos come : Cartier, Bernus, Alcide Pryor, Vrindts, Remacle, Fauconnier, Denis, ... ? Li Federåcion Walonreye-Brussele doet candjî mwints truks, nén seulmint po nozôtes walon-cåzants, mins ossu po ès sorvicaedje, shuvanmint ès vicreye. Li pårlaedje da Pierre-Yves Jeholet do 27 di setimbe 2020 m' a dné ene mo ledjir espwer :
— "Je tiens en effet à dire avec force que pas une seule langue n’est a priori supérieure à une autre." => Sorlon Pierre-Yves Jeholet, li francès n' åreut nén ene dzeutrinaedje so les lingaedjes d' Walonreye.
— "C’est oublier que le français a aussi imposé bien des souffrances linguistiques. C’est oublier le centralisme par lequel le français s’est imposé à d’autres langues, notamment en Belgique, en voulant ignorer administrativement le flamand, mais aussi en éradiquant le wallon." => Dji so totafwait d' acoird avou lu. Li lingaedje francès s' aveut rwaitî yet si rwaite todi dzeutrin les-ôtes, ki ci soeye evier les lingaedjes del Walonreye u core del Flande.
Nos dvans mostrer nosse firisté d' nosse tuzance, udonbén nos rivirans djamåy l' bontins.
- Odiovuzion : Audiovisuel
- Prumixh => Prumi : Prime => Primer
- Modiene-tins : Temps moderne
- Dzeutrinaedje : Supériorité