(Èl-Gueuye-Noere – 9inme) 25/12/2020
Li fraze ki sieve di tite roci pout shonner ene mitan sorreyalisse come ene pondeure da René Magritte. Poirtant, ç' est ç' ki dj' avize tos les djoûs, foiravant dispoy l' moes d' måss d' cist anêye foirt speciåle.
2020 est l' prumire anêye d' èm vikance wice mwintès djins ont accepté d' vir sacwantès d' leus libertés ofreyes. Al plaece di rwaitî do costé då clône del "White House" yet do costé då droetot do cwarante-cwatrinme prezidint estazunyin, el Daegne åreut dvou rwaitî do costé da Benjamin Franklin : "Those who would give up essential liberty to purchase a little temporary safety, deserve neither liberty nor security" ([WA] Les cis k' ofrixhnut leu liberté po ene mitan d' surté, n' merite nén l' prumi u l' deujhinme). Cmint polans-nos cåzer d' liberté cwand tertos doet : dmaner al måjhon li pus possibe ; ahouwer daler a l' ouxh, sortot pindant l' nute ; serer l' Oreca yet d' ôtes bouteus ki crevnut, et tchik et tchak. Sins conter k' ces rastrindances nos avént cwand minme bén kimoenné, nén-directumint, a on deujhinme recloymint. Li pire est k' ene grande troke del peuplacion n' avént nén mouvté cwand Sophie Wilmès aveut anoncî les mzeures såvritarisses. Muzeures ki n' sont nén foirt respecter på les cis ki les anonçnut, d' ayeur. Fijhoz ç' k' on vos dit d' fé yet n' fijhoz nén ç' k' on fwait, dit-st i.
L' estance daegnrece dimane rascråwant : li climat porshuve di tourner a miere, li cir di l' Urope si maxheure d' pus e pus sol sinne eternacionåle, l' unifôrmaedje des tuzances yet li siervaedje des liårds ki dismoure el djintrinnté. Tenawete, des omes yet des femes prefernut d' rouscayî po des tchôzes nén impôrtantes : po l' dierinne biestrijhe k' èn animateur aveut raconté al tévé ; po l' dierin posse di cresse k' ene sakî aveut scrît so les rantoeles di soçnaedjes ; et tchik et tchak. D' ôtes djins voeynut voltî di s' foitiser dins des camps wice li manikeyisse est rwè. I gn' a e-n efet deus sôres d' ces camps ; des idêyes contråves, mins des piceures d' accion rishonnantes. Ces deus camps, on les lome voltî antirecsisses (veypus, foite gåtche) yeyet recsisses (virpus, foite droete).
- Droetot : Bras droit
- Nén-directumint : Indirectement
- Såvritarisse : Voir "Såvritard " dans l'article "Merviyeuse cogne del Daegne"
- Unifôrmaedje : Uniformisation
- Si foitiser : Se radicaliser
- Manikeyisse : Manichéïsme
- Antirecsisse : Antifasciste
- Virpus : Voir l'article "Skide eyet Soçons"