(Èl-Gueuye-Noere – 12inme) 14/02/2021
Çoucial est èn årtike wice dji n' va nén dner èm'-n' advize. Ç' est azår li prumî côp wice dji va spåmer les plaitreyes yet les tecsecontes. Çoula est todi bén, kécfeye, d' fé ratuzer ses lijheus yet lijheuses ; al plaece di todi les bombårder d' avuzions. D' ayeur, dji sereu foirt binåjhe d' awè vost avize sol ratuzaedje padzo. Ni tchictez nén a m' evoyî èn emile rola : [email protected] ; s' i l' vos vloz.
Come vos l' av bén léjhou, cist årtike ci va djåzer des lingaedjes yet do fwait k' is povnut esse ahessants u nén. Vocial ene kesse. K' est-ç' k' on lingaedje ahessant ? Po sey oniesse : dji n' sai nén yet dji n' a pont d' avuzion dzeu. L' åjhmince syincieuse d' on lingaedje n' egziste motoit nén. Do côp, cist åjhmince la dipindreut, metans, sorlon les djins. Vost idêye dzeu est surmint diferinte di cis des ôtes lijheus. Cwand dji rlouke a çoula so des waibes francès-cåzants, i gn a totplin d' lisses totes fwaites avou des nos d' lingaedjes yet on ptit hagnon d' esplicaedje. Ces lisses la s' rishonnnut. E-n efet, elles ont cåzumint totes les minmes lingaedjes. Houte di çoula, totes s' metnut purade al plaece d' on francès ki vout daler fé då tourisse u core ki vout cwiter el France po daler bouter evoye. Di pus, cwand dji rlouke a çoula so des waibes inglès-cåzants, les lisses inglès-cåzantes sont a pô près les minmes k' les francès-cåzantes, såf k' les inglès-cåzantes rwaitnut purade les lingaedjes ahessåves sorlon les afwaires, les businesses, ey avou ene avuzion pus eternacionåle. Cwand dji rlouke todi a çoula, mins so des waibes neyerlandès-cåzants, ci côp ci, dj' a soulmint des lisses sins speciå adierça.
Vos ploz awè rwaiti dipus d' ene videyo so ç' sudjet cial u core awè lejhou des årtikes dzeu. Ene pitite tchôze nerén : dimanez avizant yet ni tchictez nén a aveur ene tuzatike a ç' ki vos lijhoz, rwaitoz u oyoz.
D' moens e moens d' scolîs walons apudnut l' neyerlandès. Sovint les parints pinsnut k' el neyerlandès n' est nén foû ahessåve po leus efants : soulmint djåzé el Flande, e Brussele ey el Neyerlande ; nén bråmint d' neyerlandès-cåzants sol Daegne ; rilomêye come estant on "laid lingaedje" ; et tchik et tchak. Ci lingaedje ci n' est nén dins les lisses francès-cåzantes ; i fåt dire k' on Parizyin ki dmane todi dins s' veye n' va, motoit, måy uzé l' lingaedje da Vondel. Tenawete, ene sakî ki dmore e Flôbek e-n åreut bén dandjî ; i fåt nén rovyî k' dins ci ribanêye comene walone la, i gn a bråmint d' Flaminds ki vicnut rola. Do côp, est-ç' k' el neyerlandès est on lingaedje ahessant u nén ?
Yeyet do costé do walon ? Est-ç' ki ç' est on lingaedje ahessûle ? Rimarkez : dj' a scrît "lingaedje" yet nén "diyaleke" u co pire "patwès". Li walon n' est, n' a måy stî yet n' serè måy on "diyaleke" ubén on "patwès" do francès. I n' fåt nén meskinoxhe el lingaedje des magneus d' djote al carote yet des buveus d' bire trapisse avou li lingaedje des magneus d' caracoles yet des buveus d' vén. Ces deus lingaedjes rola sont des lingaedjes frés yet n' ont nén èn hant popa-fi.
- Tecseconte : Voir l'article "El meyeu fime sereut walon"
- Tuzatike : Esprit critique
- Popa-fi : Père-fils