(Èl-Gueuye-Noere – 14inme) 23/03/2021
Come bråmint di djins, dj' inme li fotbale : cisse spôrt inglès k' esteut rade divnou li spôrt li pus peuprece del Daegne. Dispoy tot pitit, dji so didins. Mins nerén, dji l' so ene mitan moens k' i gn a cénk ans ubén cwénze ans. Portant, dj' a todi sopoirté, yet dji sopoirte co, mes deus clubs di cour : l' Esportigne yet l' Olympike di Tchålerwè. Tenawete, pindant les copes des clubs uropeyins, dj' a todi yeu ene preferince po li FC Barcelona ; cisse club ci souwe l' firisté di tote ene nåcion : li Catalogne.
S' i vs savoz comint est m' distchantmint rwaitant l' fotbale d' mestî. Rén k' el Beldjike, dispoy 2008, avou leus sistinmes di play-offs al Mareye-Cwate-IV-sol-pont-nouf, come l' dijheut voltî èm trepassé vî-pa. Ci sistinme inla, ç' est nén pol fotbale, ç' est e-n efet purade pol baskete. Tot a divnou pus målåjhey, pus loigne yet pus mårtournant cwand les divizions dzo l' D3 (lomé e francès, dispoy ci såjhon ; Nationale 1 ; mins ki padvant si lomeut ; Division 1 Amateur) ont stî divizé etur tchampionats flaminds eyet tchampionats walons i gn a, bén rade, cénk anêyes. Li pire, ç 'est d' awè ene D2 (lomé : Division 1B) avou soulmint ût ekipes ; sins conter k' cist anêye i gn a ene ekipe espwer al plaece d' on club pro. Cwand on rwaite les nos des tchampionats bedjes, on croereut bén k' is såynut d' sey politicmint comifåt po nén schoirter les ptitès djins.
Mins vocial ki dj' a-st asprindou co ene boune. Li federåcion bedje a acsepté d' organizer on tchampionat avou l' Neyerlande, come i gn aveut avou l' fotbale feminin al atake del dijhnêye 2010. D' aboird, li ci des femes n' aveut nén vraiymint etourpiné. Di pus, tertos sait d'dja k' çoula profiterè pår åzès grandès ekipes bedjes yet neyerlandesses. Yeyet infén, el madjorité n' el vout nén. Li råjhon po on rabindlaedje des deus tchampionats, ç' est l' boursete. E-n efet, cwand cis ligues rola sont totes seules, eles n' ont soulmint k' €70M tchaekene conte €350M eshonne. Dj' espwere co k' les Neyerlandès vont evoyî ci pordjet ci peter evoye. Åzès dierinnes noveles, les orandjes shonnnut pus reyusses k' nozôtes so ç' sudjet la.
Les ôtes payis n' dimannut nén mî. Asteure, bråmint des tchampionats ont ene ligue avou deus, virpus troes copes. Çoula est ossu l' minme å schayon uropeyin : deus copes uropeyinnes po les ekipes nåcionåles. On dit k' les djouweus sont trop bén payîs. Dji so d' acoird avou çoula. Tenawete, cwand dji voe k' i djouwnut, enute, deus, veypus troes côps totes les samwinnes ; dji n' vodreu nén awè leus vicances. Seuxhant k' is polnut nén fé ç' k' is volnut : is polnut nén mindjî ç' k' is volnut ; is polnut nén vir leus familes ; is polnut nén prandjler pindant on moumint d' l' anêye ; is doivnut bén s' kidure come des priyesses ; et tchik et tchak.
On va azår s' amuzer avou l' cope daegnrece di 2022 e Qatar, avou les djouweus k' i vont sofoker, minme e-n ivier. D'dja k' el tchampionat d' atletisse di 2019 (todi e Qatar) aveut stî rwaitî come ene grande berwete. Ay don, k' ç' est insi dins cåzumint tos les ôtes spôrts peupreces : is divnnut on sacré refudjom !
- Al Mareye-Cwate-IV-sol-pont-nouf : À la six-quatre-deux
- Dijhnêye : Voir l'article "Vint anêyes pierdowes"
- Virpus ; veypus : Voir l'article "Skide eyet Soçons"