((Èl-Gueuye-Noere – 10inme) 14/01/2021
Edit : Candidateure saetcheye evoye dispoy li 16/01/2021
El tite cåze di lu-minme : dj' åreu stî manaedjeu del varyisté walon-cåzante do Wikipedia, pindant, å moens, ene anêye. Dji rmerceye co les djins k' avént voté po mi al atake del anêye 2020 po m' diner mi tchance. E-n efet, dj' aveu dmandé a divni manaedjeu so ç' waibe, pask' i gn' aveut ene sakî ki vneut do Braezî yet k' i voyeut voltî d' fé s' riclame so nosse Wikipedia. Dji lome çoula då vandalisse. Ns avans ene grande tchance d' awè on Wikipedia, wice on pout asprinde li walon yet d' ôtes lingaedjes, tot-z e pouvant contribouwer dzeu ; mins i gn' a des djins ki croeynut bon d' uzer ces waibes po des adierças egoyisses. Houte di çoula, ene IP avou askepyî èn årtike so ene tchinne di televuzion ey al plaece di scrire on tecse dzeu, cist IP aveut scrî totplin d' påters di porcea conte on politikî – tot çoula e walon. Ces candjmints rola n' sont pus veyåves enute, mins l' årtike est todi disponibe avou då veritåve contnou asteure. Vos pinsoz bén k' i faleut trevni padvant d' aveur sacwants problinmes.
Ns estans cwåte djins a sovint bouter so ç' Wikipedia. Tenawete, nos riçuvans kécfeye on côp d' aspale d' ôtes waloneus yet d' waloneuses eto. Pus rålmint, i gn' a des djins d' ôtes Wikipedias, n' vicant nén e Walonreye, ki vegnnut ossu contribouwer. Dj' a d'dja bouté so des problinmes di categoreyes yet d' imådjes a disfacer avou on Daenwès. Dj' a eto veyou k' èn Itålyin vént, on cop u deus, scrire ene sacwè.
L' anêye 2020 a stî boune po les afwaires des Wikimedias walon-cåzants. Li Wikipedia yet li Wiccionaire walon-cåzants porshuvnut leus activités avou des contribouwaedjes pus nombreus, på l' aidance del parminêye. Ç' est e decimbe 2020 ki li Wikisourd walon-cåzant s' aveut dislaxhî do Wikisourd eternacionå, wice il esteut dispoy li moes d' måy 2018.
Dj' a brånmint d' båketes po cist an, do moens si èm mandat est porlondjî. Li prumire est d' porshuve mes pordjets ki vos ploz lire so m' pådje d' uzeu so Wikipedia. Li deujhinme est d' sayî d' assaetchî pus des djins, nén soulmint so nos troes waibes Wikimedyins, mins eto a-z asprinde li walon, e djenerå – ubén èn ôte lingaedje del Walonreye. Dj' a d'dja djåzés des råjhons po çoula dins èn ancyin årtike, mins dji pinse ki dji doe dire k' ces lingaedjes dimannut impôrtants pol tuzance walone.
Foû d' Wikipedia, dji so etrin d' ratourné, e rfondou walon (al scrijhaedje) ey e minme tins e patwès di Tchålerwè (al dijhaedje), "Li Bijhe yet l' Solea" da Aizope, èn ôteu del Grece do vî-vî-tins. Dji sereu li deujhinme Tchålerwètî a l' fé, mins dji sereu l' prumî Djumtî al tradujhî d' èm prumî lingaedje (li francès) viè li pus grand lingaedje di nosse nåcion (li walon).
Dji n' sai nén si vs avoz léjhou li l° 96 di Li Rantoele ? Dji n' sai nén si vos knoxhoz cisse gazete k' est eplaideye tos les trimesses ? A tos les côps, ç' esteut l' prumî côp wice on d' mes årtikes aveut stî eplaidî dins l' presse. Dispoy çoula, dj' a rimarké ki bråmint pus d' djins vegnnut lére mes årtikes : kécfeye ça monte disk' a 10 lijheu å djoû ; conte 4 a make, padvant. Virpus, li tot prumî årtike di Li Walofile Gazete a stî léjhou 103 côps (li no d' cist årtike est : El meyeu fime sereut walon).
- Virpus : Voir l'article "Skide eyet Soçons"