(Èl-Gueuye-Noere – 5inme) 16/10/2020
Ç' est come çoula ki dji rwaite mes vint prumires anêyes d' èm vikance. Dji m' a rabaitî e-n avri 2019 ki dj' aveu pierdou do tins pindant deus dijhnêyes.
Dj' aveu, a ç' tins la, d'dja vint ans. Avri 2019 est l' moes wice dj' aveu cminxhî a asprinde li walon. Avri 2019 est ossu l' moes wice dj' a savou, pus u moens, ç' ki dji vodreu fé pindant m' vicance. Houte di çoula, cisse moes est ossu l' moes wice dj' a comprindou ki dj' esteut eyet ki dji so co enute : on walon, k' est fir di l' esse, volant contribouwer al ahouwaedje ey al emancipåcion des lingaedjes ; on walon ki vout vir ès pitite patreye loumyî eyet l' vir si dislaxhî d' on payis e faze terminale k' est l' Beldjike. Dji roveyrè djamåy li djoû, u purade el shijhnaedje, do 24 d' avri 2019. E-n efet, ç' est l' shijhe wice dj' a tchoezî mes adierças a acompli. Ene parteye d' ces adierças rola sont, azår d' asprinde li walon, mins eto d' contribouwer a s' sorvicaedje, pa l' aidance do Wikipedia yet do Wiccionaire. Les-ôtes adierças sont purade des screts pordjets. Et way, dji voet voltî d' aveur sacwants sicrets, mins bon ki vloz-vos ? Les djins retrôkinêyes ey adroverteye wådnut sovint des screts.
Cwand dj' esteu pitit disk' a mes saze ans, dj' esteu todi reclôs al måjhone, dirî ene waitroûle. Avou m' copiutrece, el tévé oubén èm djeutrece. Dj' aveu cwand minme stî esclefe des djeutreces. Sol momint, dj' a yeu målåjhey d' e prinde asteme. Ç' est seulmint enute cwand dji rwaite èm vicance di padvance ki dji rimarke ki les djeus videyos prindént brånmint d' tins. Tenawete, cwand ene djin est mierseule , les djeus videyos lu dizanoynut bén. Ils avént prindou ostant di plaece pindant m' n' efance eyet m' n' adocrexhince ki l' alcol prind del plaece dins l' toledjoû d' èn alcolike.
Viker sins nole passion, ç' est come viker po bouter : dj' ô bén ki ç' n' est nén viker. Ôtrumint scrî, viker sins nole passion, ç' est viker a la "Black Country Blues". Dji saye todi d' viker avou mes passions. Çoula m' amuze eyet dene on sinse a m' vicreye. Mes pordjets lu dinnut ewålmint on sinse.
D' ayeur li recloymint m' a acsegnî k' i fåt viker come tchaeconk lu bedive. Li recloymint e Walonreye, mins eto e Beldjike, veypus e-n Urope, s' a tradujhî på ene dédjelêye sol longue-termene. Tertos s' aveut gayolî a s' måjhone on bimesse come des Enocins XIV po hertchî li stråmêye do cronivirusse. Sorlon mi, li recloymint esteut l' acceptåcion del berwete. Li berwete estant k' nolu a preveyou les shuvances d' èç maladeye. Nos n' dalans nén djåzer del cråne manaedjaedje del crijhe-minêyrece på les cis ki doevnut riprezinter nozôtes, li peupe. Mes vint ans, li recloymint yeyet les problinmes politikes bedjes m' ont acsegni ki tertos n' vike k' on côp eyet k' el moirt est pus djondant k' nos l' pinsans.
- Dijhnêye : Décennie
- Adroverteye : Introvertie
- Djeutrece : Console de jeu vidéo
- Djeu videyo : Jeu vidéo
- Veypus : Voir l'article "Skide eyet Soçons"
- Bimesse : Bimestre ; deux mois
- Crijhe-minêyrece : Crise sanitaire