(Èl-Gueuye-Noere – 34inme) 27/06/2022
George Orwell, c' esteut on scrijheu estazunyin di distopeye. Dit-st i : li spôrt po wangnî, « c' est djusse èn eshonnaedje d' hinne, di djalozreye, di måvasté. Foû des rîles, mins avou on plaijhî barbåre a-z assister a des margougnaedjes. Dj' ô bén, c' est l' guere sins les fiziks ».
Çoula mi fwait sondjî å fotbale. Les copes d' Urope eyet daegnrece sont-st ene manire po des payis a mostrer ene sôre di roedeur. Po on côp k' el Beldjike pout wangnî ene guere. Copuvite tote seule : sins awè dandjî d' on grand. Tolminme, on rastind co on tite avou li djeneråcion e-n ôr. Li prumire plaece k' les Rodjes Diåles avént yeu a Anverse, e 1920, n' est pus assez. Avou ça k' on pinse voltî a l' måvasté k' i gn a dispu l' match inte li France ey el Beldjike, e 2018. Fåt ricnoxhe k' el fotbale, c' est l' seule sacwè a co fé viker li payis da Flupe. Fåt ossu dire k' li spôrt, c' est l' seule firisté des franskignons. Mi eto, dj' aveu stî ecepé pa ces margayes d' gaméns. Epwis, dj' a candjî. Avou l' tins, on comprind k' ci n' est k' ene afwaire do pwin eyet des djeus. Asteure, dj' end a d' keure. Ça ni ns va nén rinde les teres k' on-z a pierdou do Lussimbork. Dji n' a pus l' tins po ces biestreyes dinsi. Asteure, dj' inme mî m' ratuzer a des afwaires pus nuks eyet sincieuses. El vicåreye va rade ey on vike k' on côp. Dijhans todi kécfeye !
Cwand vos rwaitîz do coté del Russêye, on voet åjheymint k' li spôrt sieve al guere. Les sportifs d' èç payis la ont stî metou a l' ouxh di totplins d' federåcions. Poirtant, d' ôtes payis fijhnut des mizeres timpesse : metans, Israyel. I m' shonne k' i n' a nén stî calindjî po ses margayes avou l' Palestene. Come cwè : des sakîs rtoûnnut bén leus frakes. Foiravant, tot djudjant des djins k' is n' ont, azår, rén dmandé. Des djudjmints årbitraires bén lon des pårlaedjes da Coubertin.
Li fråzlete : do pwin eyet des djeus. Ça a stî ahivé po les djeus di l' Impire Romin. On peupe k' aveut foirt crexhou ; k' esteut dvant les ôtes a l' epoke. Cist impire rola a divnou rade nawe. Avou nozôtes, dji croe bén k' ça dvént pé. Paski pocwè ? Pask' on est ki distrure el Daegne. Ci n' est nén e dalant dmorer so Måss k' ça va mî daler. Nosse societé, c' est « do pwin eyet des djeus ». C' est aprume do pwin, paski, po on côp, bråmint des djins polnut mindjî comifåt. Totfeye, c' est eto des djeus pask' el monde ershonne podbon a ene distopeye avou ene fén tradjike. El djintrinnté doet co s' amidrer, mins ele inme mî di s' fé binåjhe a dmaner a n' pus rén fé d' bén.
Dj' a do må d' vir des djouweus esse payîs des miyons po mete des gôls. Copuvite k' el shuvante cope a stî fwaite sol dos d' mwints mandayes modienes. Al copete do mårtchî, les candjmints climatikes sont ki ns apicî. Adon, ni moenner nén ene oto. Tenawete, vos ploz voyaedjî avou èn areyoplane di l' ôte costé del Daegne, al plaece. Padvant, fåt awè les liårds. Djans ; do moumint ki vos n' daloz nén el cinte-veye avou ene pitite teuf-teuf.
- Distopeye : Dystopie.
- Teuf-teuf : Voiture sans permis, voiturette.