(Èl-Gueuye-Noere – 15inme) 12/04/2021
Tos les Walons, azår tos les Bedjes, motoit tertos sol Daegne rwaitnut Tchålerwè come estant l' pus laide veye daegnrece. Les Tchålerwetîs yet Tchålerwetresses reyadjixhnut d' deus manires diferintes. Li prumire est d' esse d' acoird avou çoula ; l' ôte est di esse nén d' acoird avou çoula. Dji comprind les dmorants ki dijhnut k' èç veye la est bele, come dji comprind les ôtes dmorants ki dijhnut k' elle est laide. Dji voe voltî l' Noer payis po sacwantès råjhons, inte di zels l' fwait ki dj' a cåzumint todi viké rola. Tenawete, dji n' so nén blende, mins purade reyalisse. Est ç' k' el 6000 est ene bele rebanêye comene ?
Neni, Tchålerwè n' est nén ene bele veye. Mande escuze si mwints lijheus sont makés på m'-n' avize. Dji dmandreu voltî a ces lijheus inla d' lére pocwè. Comint ene veye pout esse nozêye avou des riketes k' on trove so les voyes yet dins l' nateure, mins nén dins les batchs ås mannestés ? Comint ene veye pout esse djoleye cwand on prefere basti des iperbazårs dins l' cinte-veye, ubén nén lon d' ene otorote, al place d' fé viker les botikes coinreces yet ç' k' estént les grands hamteas des pitits bans åtou del cinte-veye ? Comint ene veye pout esse bele cwand l' mitan del vicance economike d' èç rebanêye comene la s' raplout soulmint so èn areyoport touristike, wice el rotaedje est frûlé dispoy l' parminêye ? Comint pout-on esse binåjhe d' viker dins ene veye, wice el porcint di pwintaedje yet d' pôvurté dimannut schirés ? Comint pout-on ossu esse binåjhe k' èç veye la n' prodût pus ossu bråmint k' dins l' erirece ? Comint préjhî ki Kiwi Jackson yet l' persounaedje baracresse da Tamara Payne, Stacy Star, soeynut rwaitîs come estant, enute, les simboles tuzançreces do 6000 ?
Poirtant, Tchålerwè n' est nén foirt dizårmeye. Tot rwaitant l' tuzance, elle aveut yeu des grands årtisses (på egzimpe : Léon Bernus, Bob Dechamps, yet Wilhelm Dunker). Poirtant, l' Noer payis djouwit ewalmint d' ene nouzome ritchesse cosmopolite. E-n efet, ç' est on des seus edroets wice les kiminåltés etrindjires yet walone s' etindnut bén. Ç' n' est nén come e France ey e Flande, wice i gn a des grands movmints politikes zenofobes ki saynut d' divizer l' peuplåcion. Ç' n' est nén eto come åzès Estats-Unis, wice el societé divize les djins sorlon leus coleurs del pea ; les Estats-Unis k' est on payis avou on sistinme di peuplåcion foirt racisse, avou : les Blancs d' on costé, les Noers d' èn ôte costé, les Latinos d' on troejhinme costé, les Levantreces d' on cwatrinme costé yet les Vraiys-Amerikins k' les colons avént bén tchessî evoye. Pindant l' nouvazinme sieke, Tchålerwè esteut on coron impôrtant del Walonreye, k' esteut l' moteur del deujhinme poûssance economike, k' esteut el Beldjike d' cist epoke inla. Wice s' trove el firisté des Tchålerwetîs yet Tchålerwetresses ? Wice s' trove leu-z ambicion ? Wice s' trove leu råvion d' candji po todi divni meyeu k' davance ?
- Iperbazår : Centre commercial
- Vraiy-Amerikin : Amérindien
- Nouvazinme => Nouvaze : Dix-neuvième => Dix-neuf (Néologisme, invention de l'auteur, qui constitue une alternative aux "dijh-nouvinme" et "dijh-nouv")