(Èl-Gueuye-Noere – 21inme) 09/08/2021
Les cis ki s' competnut åzès lingaedjes savnut bén k' end a totplin ki sont mancîs d' disparexhe. Nozôtes, les walon-cåzants, kinoxhans bén cisse reyalité cial. Cist årtike ci ni va nén rwaitî comint eyet pocwè les lingaedjes walons, virpus bedjes, sont mancîs. Ci problinme la n' est nén èn acro. El caizerlikisse linwistike, c' est l' diyocside di carbone d' èç syince rola. Mågré tot, i shonne k' ene loumire loumte al fén do trawa. Mins nerén, i fåt sawè k' on-z n' est nén co å coron d' ses royes. Totfeye, dji vou bén aboler on fistou d' optimisse. Nos avans dandjî, afeye, di mwintès d' bounès noveles. Nos e-n avans copuvite mezåjhe, pindant ces spessès termenes come li ci d' enute.
Ene prumire ravicance linwistike, c' est li ci do kerneweke. Ci lingaedje cial vént tot droet del Nonne-coûtchant di l' Inglutere. Li kerneweke, c' est aprume on lingaedje celtike come li gayelike escôswès, på egzimpe. Asteure, i nd a pus di troes meyes djins ki l' cåznut. Po on lingaedje k' ere clatchî tot-z estant moirt, c' est purade ecoraedjant po l' avni. Si on louke ås ortografeyes do kerneweke, on s' adouye k' i gn a etur troes eyet cénk ortografeyes. El lingaedje walon, i gn a bråmint des djins ki voeynut voltî d' si mamborner, minme si ns e-n avans seulmint deus : li sistinme Feller eyet li rfondou. Si avou deus c'est d'dja målåjhey, dji n' vou nén tuzé avou cénk.
Ene ôte ravicance, c' est l' ci di l' ebreu k' est rwaitî come li lingaedje des Djwifs. L' ebreu ava stî rovyî pindant cåzumint 2000 ans. Ci sont les djwifs k' avént bagué disk' e-n Israyel, ki l' ont fwait rviké. D' ostant d' pus, k' el ebreu, c' n' esta eto k' el lingaedje del Tora. Ci boukin cial, c' est l' Bibe po li djudayisse. Po vos dire k' on lingaedje erlidjeus al atacmint est divnou, ubén rdivnou, on lingaedje di tos les djoûs. Çki s' a passé avou l' ebreu poreut bén s' ricopyî avou l' latén. Ci lingaedje roman la, c' esta on mier impôrtant lingaedje divinltins. Asteure, il est moirt et ramoirt, åré dins les hots liveas do monde do crustinisse. Tenawete, bråmint des djins s' competnut a ç' lingaedje ci. Après côp, tos les lingaedjes romans (vicants) d' enute dischindnut do latén.
Tot çoula po vs acertiner k' on lingaedje moirt n' est nén on lingaedje disparexhou. Tot rwaitant èç dierinne sôre di lingaedje, i nd a des ricwereus ki strimnut a les erconstrure. Les cis k' ont d'dja oyou del erî-rifwait-indo-uropeyin savnut dandjreus cwè. Do côp, i n' fåt måy s' taper al disbåtche. Come cwand i n' fåt ossu nén s' diloujhî, cwand ene sakî vs forbate ki mwints lingaedjes "ni sievnut a rén". Sovint ces minmes djins la n' el savnut nén çk' is glawinnut. Adonpwis k' e linwistike, des lingaedjes "ki sievnut" eyet des lingaedjes "ki n' sievnut nén", ça n' egziste nén pask' i c' n' est nén syincieus d' bouter come çoula. Rén n' est on doetoe el univiers. Si l' inglès est rwaitî come el lingaedje daegnrece enute, i pôrè divni on ptit lingaedje dimwin. Seuxhant k' åzes Estats Unis, les spagnol-cåzants crexhnut dins l' peuplåcion. Seuxhant k' el Chine va azår divni el prumire poûssance economike. Seuxhant k' il est todi mî d' cåzer avou on soçon dins on lingaedje nén-peuprece po raconter ene pice. Come d' efet, il est pus åjhey d' raconter ene pice e volapouke ubén el lingaedje da Defrêcheux ki dins les lingaedjes da Shakespeare eyet d' Molière. Seuxhant eto k' on-z asprind puvite on lingaedje pa passion k' pa rastrindance ; et tchik et tchak.
Po fini, dji vôreu bén d' cåzer, ene miete, di l' estance do tchampnwès. Ci lingaedje cial est cåzé e li France, dins les redjons d' li Tchampagne eyet li ci di l' Årdene ki si trove rola. Ådzeu d' ça, il est ossu djåzé dins ene coigne del Walonreye. Il est djåzé åtou di Vresse. Li tchampnwès n' est nén core moirt. Do moens, pindant ki dji scrî ci tecse ci. Ès-n' eure dimane carapmint djondante. Ci lingaedje d' oyi cial pôreut riployî haerna eyet disparexhe, å minme tins. Çoula dimane foirt dihåjhiné. Dji m' agrance n' vos awè nén maké avou l' dierin hagnon.
- Reyalité : Réalité
- Virpus : Voir l'article "Skide eyet Soçons"
- Caizerlikisse : Impérialisme
- Kerneweke : Langue cornique
- Tora : Torah
- Erî-rifwait-indo-uropeyin : Proto-indo-européen
- Volapuke : Volapük