(Èl-Gueuye-Noere – 6inme) 01/11/2020
Li Walonreye a cwand minme sacwantès bele cognes. I l' fåt ricnoxhe. Nos schoûtans brånmint des djins deplorer k' i gn' a rén el Walonreye eyet k' i fwait pus bea el France, el Sipagne, el Itåleye et tchik et tchak. Motoit bén ki po povwer vir ces beas edroets, i fådreut distinde ès tévé, si moussî eyet daler mårtchî a l' ouxh. L' edroet ki dji va cåzer est on rimanant del noere istwere tchålerwetresse. Èç plaece est, e fwait, on teri.
Cisse teri s' trove å Rou-dilé-Tchålerwè al limite avou El Dochreye eyet Djumet, dj' ô bén i s' trove å Bijhe-Coûtchant del veye. I gn' egzistnut deus intrêyes : li prumire est on hertchaedje e tera, aski l' dierinne est on tchimwin pus lon eyet pus åjhey a monter. Nos avans ene clapante avuzion so les hamteas do Levant del Rou-dlé-Tchålerwè, sol limite etur Gochliye yet Courcele, sol l'Bijhe-Coûtchant del Dochreye, sol Providance, sol les deus towes del cintråle, insi k' so canå Tchålerwè-Brussele eyet sol rantoele des trins riloyant Tchålerwè, Brussele ey Anverse. Sol miercopete, nos plans awè ene avuzion d' pus sol teri e djenerå. Di pus, i gn' a on laetchea a cist edroet. Cisse laetchea est cåzumint vide veypus inegzistant e-n esté, mins il divént plin eyet lådje e waeyén-tins, sortoit padri èl plouve. Cisse plaece sitantche ene peclêye d' åbe yet d' verdeure ki pout etaiti les binamés del nateure. D' ayeu, on fime a stî filmé dzeu e 2012, ç' ki vout dire k' il a on bon rinon come estant on bea edroet po filmer.
Dji vos conseyreu d' li viziter pus rade el shijhe e-n esté obén pindant l' vesprêye cwand ç' est l' waeyén-tins oubén l' bontins. E-n efet, cwand vos vizitez cist edroet pindant l' vesprêye e djulete u core e-n awousse, vos riskez d' fé ene tchåfete avou l' Solea ki tape ey èn absance d' avûcir. Asteme si vos daloz rola åtou di l' ivier. E-n efet, avou l' froed, èç teri est purade ridant, do côp vos riskez pus åjheymint di tchaire.
Ç' ki est bén rola, ç' est k' i gn' a cåzumint todi nolu. Vos ploz profiter del momint sins esse disrindjî på ene sakî. Cist edroet n' est vraiymint nén touristike. Les seus côps wice vos ploz rescontrer des ôtes djins, ç' est cwand i vont daler rôbaler leus tchéns oubén cwand i vont rola po fé do motocrosse, minme si les djins k' i-z e font sont råles.
Houte di çoula, dj' a d'dja askepyî on djermon sol Wikipedia walon-cåzant dzeu. I gn' årè pus d' contenou bén rade. S' i vos vloz, vos ploz eto contribouwer a ç' djermon. On sreut bén binåjhe d' awè on cop d' mwin di (noveas) uzeus. Po les cis di vozôtes k' is n' savnut nén daler rola eyet k' is volnut vir a cwè cist edroet rshonne, vos ploz trover sacwantès fotografeyes tot clitchant so cisse loyén (https://commons.wikimedia.org/w/index.php?search=Teri+Naye-a-Bw%C3%A8s&title=Special%3ASearch&go=Potch%C3%AE&ns0=1&ns6=1&ns12=1&ns14=1&ns100=1&ns106=1). Tot-z esperant, k' vos pôroz l' viziter on djoû avou les recloymints ki s' shuvnut. Al avni, on-z årè mwincô pont l' droet d' respirer eç payis avou des mzeures såvritards ki vont åzar sey prijhes.
- Veypus : Voir l'article "Skide eyet Soçons"
- Tchåfete : Insolation
- Motocrosse : Moto-cross
- Såvritards : Sécuritaristes