(Èl-Gueuye-Noere – 41inme) 19/10/2022
Pindant cwatre ans, dj' a rastindou el novea albom da Muse. C' est ene binde di rock burtaenike. Dj' el a oyou voltî, contråvmint å ci di dvant, k' a vudî e 2018. Cist albom ci esteut podbon emîtrin. Motoit ki vs el savoz ddja, mins l' dierin albom n' est nén li mwaisse suddjet d' èm-n' årtike. Tolminme, gn a ene tchanson ki m' a tiké. C' est li prumî côp k' Muse uze des djuraedjes dins ses tecses. Come di djusse, el no d' ene tchanson, c' est : We Are Fucking Fucked. Si on-z el ratoûne e walon, ça dene : Miyård, ns estans båjhî. Vos daloz vir k' ces djins la ont purade råjhon. Les mots uzés n' dimeurnut nén les pus agalis, mins ça va avou l' deure vicance k' est ki nos mastoke. Avou ça k' Muse a todi yeu des messaedjes politikes. Sovint, c' est conte el sistinme d' asteure, mins ça, is n' ont nén rastindou cisse dijhnêye ci. C' est dinsi dispu l' fén del dijhnêye 1990.
Ouy, on-z est e 2022. Mins nerén, el bande cåze ene miete voltî del pårminêye. Fåt prinde asteme k' el diåle ni ns apice nén co deus anêyes après. Dijhans todi kécfeye ! Dvant d' passer a ene ôte sacwè, fåt vir si l' sistinme di santé rote comifåt. On-z est seur k' les recloymints, spotés pa grand monde « sistinmes d' egayolaedje absurs », vont daler come pondou. On-z a bén dandji d' sawè s' tini å coxhes. Foiravant k' el societé a co tchait el coufåde. Po des råjhons diferintes, ci côp ci.
Epwis, ces troes omes la dviznut del guere el Oucrinne. Ils ont sogne ki ça soeye, dazår, li troejhinme guere daegnrece. On-z ôt sovint ci fråzlete do no, a tchaeke côp k' i gn a des novelès margayes diplomatikes. Cwand dj' esteu co on gamén, les djins creyént voltî k' el guere civile el Libeye daléve må tourner. El Beldjike, ci disdut politike la ni ns a måy espaitchî d' viker e påye. El Libeye, les dmorants porshuvnut co asteure a beyî après ene meyeuse vicåreye. On s' aveut tolminme aprester a ene guere daegnrece avou les terorisses del dierinne dijhnêye. La cobén k' c' est fini avou ces rîlêye-moudreus. Al plaece, on si fwait economicmint mamborné po disfinde el nouzôme democraceye conte les mwais Russes. Les djos ns vont dner des plaeces pol paradis.
Li tchanson mincione ossu les rascråwes del nateure : metans les feus des bwès eyet les hosmints d' tere. Avou l' deujhinme, c' est, po on côp, nén ene biestreye da nosse. C' est çk' on lome : el tectonike des plakes. Totfeye, avou li prumî, c' est ene ôte afwaire. Tchaeke anêye, on-z assiste a on djeyant fornea. Ça n' si passe måy a Lidje, a Tchålerwè, a Mont ubén dins èn ôte payis d' houye. Neni, ça s' passe lon d' amon nozôtes. Do moens, disk' å moumint pindant ç' ki dji scrî. Adon, a-z aveuri, a l' avni.
I m' shonne k' mes omes crindnut foirt del moirt eto. Poirtant, cwand on rwaite, ci n' est nén l' pé des sacwès. Po-z esse oniesse, i fåt mî eraler ki d' viker dins les mizeres ki s' aprestêynut. C' est ene miete po ça ki bråmint des djonneas, come mi, ni volnut nén d' awè des efants. Ça dmore ddja mo sbarant k' i gn a nén des sakîs timpesse ki n' si distrujhnuxhe nén. Asteure, i fåt sepi s' i ça n' va nén ataker. Al fén des féns, on l' pout dire åjheymint : on-z est dins l' penin !
- Dijhnêye : Décennie
- Sistinme di santé : Santé publique