(Èl-Gueuye-Noere – 32inme) 31/03/2022
Come totplins di djins el Waloneye, dj' a schoûté l' dierin albom da Stromae. Onk des tchansons, c' est « Enfer » ([WA] Infier). Dji n' va nén fé on corwaitaedje d' cisse tchanson ci ubén d' èç-n' albom la. Po çoula, dj' inme mî co d' rastinde ene miete. Yeyet co, i s' pout ki dji m' ravize terchedon. Cist ovraedje ci årè fwait bråmint d' ramdams. Il årè ossu stî l' suddjet d' racontaedjes di totplin des canletes. Po mi, ça a stî on tecse a ratourner pindant onk d' mes egzaméns.
Li tchanson, « Enfer », ele djåze do metaedje a fén. Stromae rwaite puvite el sucide come ene sacwè k' est teribe. Tolminme, gn a des djins ki s' distrujhnut. Paski pocwè ? Ça, ça n' mi rwaite nén, pinse-dju. Totfeye, dji m' a todi dmandé pocwè sacwantès sakîs volnut leyî ses hozetes, aprume el Waloneye. El savoz ? Fåt dire k' on n' a nén a clousser, contråvmint åzès djins vnant d' on payis d' Urope levantrece. Poreut vali k' el diåle ni ns apice nén. Dijhans todi kécfeye !
Come dj' el escrijheu dins l' dierin hagnon. Stromae shonne esse conte li sucide. Motoit ki dji vos va maker, mes djins ; mins gn a des ôtes ki trouvnut k' el metaedje a fén a eto des beas costés. Cist årtike ci n' est podbon nén politicmint comifåt. Adonpwis, li politicmint comifåt, ci n' sereut nén ene manire d' esse doûce alinne ? Vos djudjroz bén d' çoula a vosse måjhone. Mins nerén, on va såyî d' ledjirmint prinde el contrupî d' l' advize djeneråle roci.
Po-z ataker, les djins ki s' distrujhnut sont moirts. Adon, is n' ont pupont di problinmes, veyanmint k' is n' vicnut pus. C' est l' veur k' on-z est bråmint pus påjhûle, tot-z estant revoyî. On-z a, come di djusse, moens d' egadjmints a respecter. Metans : adiercî s' côp pindant s' vicåreye, payî ses cwitances virpus ses detes, et tchik et tchak. Ci n' est nén on moirt ki va todi transi po rén. El vicance, ça pout esse ene bistoke. Totfeye, po kékès sakîs, el vicance pout sey èn infier. Comint daler trover èn efant d' Palestene yet lu displiker k' c' est gaiy d' viker ? Dji vôreu bén l' fé. Tolminme, dj' a les pinses ki dj' åreu l' air biesse.
Houte di çoula, evitez li pus possibe d' erdire les cis ki tchoezixhnut di s' mete a fén. Avou ça, estans-nos sûtis assez po les comprinde ? Savoz, afeye, les råjhons sont mo acoirdåves. Pwis, el moraedje, ci n' est k' nosse dierinne estape. Å monde, tot cmince eyet tot finixh. Adon, s' distrure, ci n' est k' dihoter pus timpe. Do côp, fådreut esse djinné di vleur peter evoye del vicåreye ? C' est l' messaedje ki Stromae såye di poirter. Est-ç' ki vos vs acoirdez avou lu ? Ça fwait tuzer yet ratuzer timpesse, endon.
Tenawete, dji m' agrancixh ki vos n' daloz nén fé ene biestreye. Cwand vs av ene rujhe, li mî, c' est daler taper å lådje. Djans ; pus åjhey a dire k' a fé. Dj' åreu bén veyou voltî di pleur vs aidî, mins dji n' so nén sûti assez.