(Èl-Gueuye-Noere – 29inme) 29/01/2022
On-z a bén croeyou k' on-z årè stî yeu disk' al fén des féns. Tenawete, li cénkinme lene do ledjir metro di Tchålerwè va bén esse metowe e-n ovraedje, on djoû. Ça fwait tolminme troes dijhnêyes, enute, k' cisse lene ci åreut dvou esse drovowe ås voyaedjeus !
Tertos sait k' el ledjir metro di Tchålerwè, ça a todi stî on nouzome ramdam ey ene teribe berwete. Totfeye, ça a bråmint candjî dispu l' epoke del fén des Vicinås, savoz. E 2013, on-z a, infén, drovou li lene ki raloye Tchålerwè eyet Gochliye. Avou ça ki l' anêye di dvant, on-z a eto drovou li Blouke cintråle eyet les dierinnès ståcions del lene viè Djilî. Dji m' sovén k' a l' atake del pårminêye, e moes di djun 2020, les trams ont rataké a rôler do costé d' Anderluwe. Come di djusse, li TEC aveut rifwait mwaisse cisse pårtêye la del rantoele k' aveut divnou foirt viye. Houte di çoula, les rames vont ossu sey rifwaites mwaisses. Ké boune novele ! Po-z awè veyou sacwantès fotos, dji vs pou dire ki dji so bén binåjhe do rizultat. On n' a podbon nén yeu dandjî d' acater des noveles motrices. C' est l' veur k' c' est vraiymint mî po l' ecolodjeye. Dj' espwere k' les Flaminds di De Lijn vont ns rinde les cis k' ils avént epronter dins l' dijhnêye 1980. Mins nerén, les BN d' rola sont ki sont distrût les onks après les ôtes. Do côp, dj' a sogne k' el motrice 6102 va shuve el minme tchimwin. Poirtant, on-z el åreut plou mete e-n ovraedje dins l' metro. El pårtêye do mitan n' a nén stî rabaxhêye come les cénkante 6000s.
Tot-z estant on fel afreus après les trams. Dji trove damadje k' el TEC ey el veye ont inmé mî d' mete des bus-banlieus po raloyî Couyet eyet Mont-dzeu-Mårciene å cinte. Copuvite k' c' esteut bén l' metro k' ît dins les plans d' 1960. Mins nerén, on voet bén avou les kimons transpoirts k' el rebanêye comene est ki ravike. Tot come li basse-vêye, minme s' i dimane co l' hôte-veye k' est dins les boutaedjes. Asteure, i djåznut eto d' fé li pus grande sicole di biyotecnolodjeye d' Urope. Ça candje ene miete des iperbazårs ki, trop sovint a m' gosse, ni sieve a rén.
Ça dimane målåjheys po totplins des Tchålerwetîs yet Tchålerwetresses di croere k' el comene pout comincî a bén tourner. L' avni crexhe pitchote a midjote. Dji ricnoxhe k' ça m' shonne lon, afeye. Cwand dji rlouke åzès candjmints, dji so fir. Gn åreut todi des sakîs po ns dire k' el Noer Payis va porshuve a dicwelixher. C' est co les minmes ki voeynut voltî di criyî so tot. C' est ossu les prumîs a nos rwaitî, cwand zelzôtes n' sont nén carolos : å mî come des barakîs, å pé come moens k' rén. C' est l' veur k' on s' e fote ene miete. Èm veye est conoxhowe po sey riskeuse. Gn a rén avou ça. Tolminme, dj' inme mî ki Tchålerwè åye ene mwaijhe rilomêye k' ene boune. Å moens, on-z est pus påjhûle pask i gn a nou tourisse ki vént. Ça m' a todi fwait rire les djins k' is voeynut voltî mwintès grossès veyes k' sont bén pé k' el sale payis da Bob Dechamps. Dj' ô bén : Paris, Los Angeles, et tchik et tchak.
- Dijhnêye : Voir l'article "Vint anêyes pierdowes"
- Iperbazår : Voir l'article "Tchålerwè : ene bele veye ?"
- Bus-banlieu : B.H.N.S. ; bus à haut niveau de service