(Pol MANIPRÉ – 2inme) 20/05/2022
« Vaici, pont d’ politike et pont d’ rilidjon ! »
Cisse fråze la, on l’ etind bén sovint amon les soces di waloneus. Ci n’ est nén ene si mwaijhe idêye : insi, les djins cournut nou risse di s’ margayî. Mins çoula disface eto tot ç’ k’ i gn a d’ politike dins l’ fwait d’ cåzer voltî walon.
Paski les lingaedjes — eyet sortot les spotchîs lingaedjes — c’ est ene sacwè d' politike ! Pol sawè, i gn a k' a sondjî a ç’ ki s’ passe e Côsse ou e Burtaegne, oubén i gn a k’ a vey les disburleures dins les gazetes et les rantoeles di soçnaedje sitoit k’ ene binde di comeres volnut scrire li francès ene miete a leu môde. Li lingaedje, c’ est sovint ene usteye po les spotchants ; ene manire di fé roter droet tot ls-ôtes, di fé vali leu-z avuzion do monde — li seule vraiye, sapinse zels.
Adon, puski l’ manire k’ on-z a d’ cåzer, ele va eshonne avou ene avuzion do monde, i faut s’ dimander : kéne sereut l' avuzion lodjike do monde po ene sakî ki cåzreut voltî l’ walon ? Dandjreus ki s’ monde, ci sreut on monde ecolodjisse : li ci ki voet voltî del varyisté amon les ptits lingaedjes, i voet eto voltî l’ biyovaryisté. Tolminme ki ç’ sereut kécfeye bén on monde antimilitarisse, paski les cis ki volnut k’ on les leyî cåzer come i lezî plait d’ el fé, i n’ savnut nén edurer les rîles et les cmandants. Ci sreut motoit on monde ki pudreut foirt asteme ås ptits, et termetant voereut evi les grandiveus… Et vos nd årez et vos nd åroz.
Li filozofe André Gorz a sovint scrît ki, esse ecolodjisse, c’ est disfinde li « viké monde ». I voleut dire insi k’ i n’ faut nén seulmint schaper des åbes et des moxhons, mins k’ i faut schaper eto les viyès manires di viker avou les åbes et les moxhons ; k’ i faut tenawete ritrover l’ vicaedje di nos vîs tayons, des cis ki n’ alént nén tofer ossu rade ki nozôtes, ki sondjént ene miete moens ås cwårs, ki n’ avént pont d’ televuzion…
Nozôtes ki cåzans walon, nos savans tot ç’ k’ i gn a d’ bon dins l’ vicaedje do vî timps. Copurade, si ns estans oniesses, nos savans bén ki, metowe ene après l' ôte, ces bounès afwaires la amontnut ene avuzion do monde plinne di saedjesse. Ene avuzion do monde k’ est bråmint pus k’ el some di totes ses pårteyes… Mi, dj’ oize li dire : c’est on vraiy pordjet politike, ewou çki nosse lingaedje si rtrove tot å mitan !
Ene manire di bén comprinde ki tot çoula va eshonne, c’ est d’ sondjî ås djins k’ serént ls afronteus di ç’ pordjet la — adon ns afronteus. Les cis ki pinsnut k’ les ptits lingaedjes, ça n' sieve a rén, eyet k’ i nos fåreut tertos cåzer inglès po mia fé les fikes sol Kimon Martchî, c’ est les minmes ki volnut tofer basti davantaedje e l’ payis. C’ est les cis k’ ont do tårmak al plaece do keur, les cis ki sont disconte les sindicats eyet volnut k’ on boute todi pus… I n’ faut nén esse loigne : li viké monde k’ on voet voltî, i gn a des djins k' el vôrént touwer ! S’ eployî a rlever les spotchîs lingaedjes come on l’ fwait, c’ est ddja ene manire di lûter conte ces djins la.
Mi, i m’ shonne ki, ci k’ i manke a nos Belès-Letes e walon po mia comprinde tot ça, c’ est ene grande dame come Anjela Duval. Avoz ddja etindou cåzer di ç’ powetresse la ? C’ esteut ene payizante burtone k’ a scrît sacwantès ramexhnêye d' arimés dins ls anêyes 70 eyet 80. Dins ces lives la et dins ses etervious, ele cåzeut bråmint do payizaedje : par egzimpe, ele cåzeut des tchamps d’ ådjourdu ki n’ rishonnnut pus les tchamps do vî timps retourés pa des hourleas, paski ci n’ est pus des djins ki boutnut al cinse, mins des machines. Ele cåzeut eto sovint des biesses, k’ ele veyeut voltî… et ele fijheut tot ça e l’ lingaedje di s’ payis.
Por mi, trover ene bele djin come Anjela Duval po nos recoraedjî, ci sreut l’ deujhinme afwaire a fé po cmincî a disfinde li viké monde. Li prumire, ci sreut ddja d’ oizeur rcomincî a cåzer d’ politike etur nozôtes waloneus, po nos rinde conte di tot ç’ k’ on voet voltî, et adon di tot ç’ k’ i nos rashonne.