(Èl-Gueuye-Noere – 3inme) 15/09/2020
"Èl Braibançone Walone", obén e francès, "La Brabançonne wallonne" est ene tchanson francès-cåzante da Julos Beaucarne, on tchanteu walon. Li muzike est dins l' albom, "Co n'rawète", rexhou e 2007. Ele deure moens di deus munutes. Li seu coplet deure seulmint trinte sigondes padri ene shûte di notes, shuvanmint l' cåzaedje est foirt court. Julos Beaucarne a stî droet-å-såme. Ci ki vos aloz lére dzo est èm esplikêye ki pout kimoenner lådjmint di ci da Julos Beaucarne.
Elle avént prometou on payis tot drovou, dit-st i. Elle avént prometou miråbiliå a nozôtes. K' est-ç ki muche padri li "Elle" ? Çoula est azår les politikes djins. Do pårlaedje sins rén padri, obén avou ene sacwè padri mins conte les citweyins eyet citweyinnes. Mins nerén, on n' pout nén tni zezôtes a gogne, is ni l' fwaiynut nén esprès. Come l' dijheut Bart De Wever : Nos intincions – avou d' ôtes mots : les intincions dås politikîs – sont les meyeuses po vozôtes ([FR] Nous avons les meilleures intentions à votre égard).
K' est-ç k' aveut stî prometou på ces djins rola ? Julos Beaucarne raconte a nozôtes : On payîs tot drovou sol Univiers. I n' låtche k' on prometaedje d' ene pitite gayole da zels. S' i cåzéve vraiymint d' l' Univiers, èl tchanteu aveut vraiymint veyou grand. Li Daegne n' est d'dja rén didins, ebén l' Walonreye. Oudobén, i djåzéve d' èn ôte univiers come li ci do spôrt, del politike, del ritchesse, k' est-ç k' on-z e sait ? Li payis tot drovou k' sereut l' Walonreye vôreut, motoit, rimer k' èç edroet est ene grande edroescoye. Il dimanit vrai k' nos, Walons eyet Walones, estans foirt gådieus eviè les ôtes culteures. Vos n' d' avoz k' a lére nosse divize po si leyî adire : Sont d' Walonreye sins peme tertos ki vicnut, boutnut dins l' spåce walon.
Monsieu Beaucarne beye après ene Walonreye avou des awureus dimorants ki måtchnut so cist edroet avou leus iys tot drovous. Mi croeyoz bén Monsieu Beaucarne ki dji voereut voltî d' mårtchî sol Daegne avou des ouys come çoula, mins cwand on voet l' estat d' nosse pitite patreye on-z adure bén di braire, minme di tchoûler. Li dicwelixhance ni djoke nén d' crexhe ; nosse culteure eyet nos lingaedjes vont motoit disparexhe ; l' economeye pinde a l'åwe ; di pus e pus d' mwintès d' nos bijhrece vijhéns nos voeynut evî eyet di pus e pus d' sacwantès d' nos nonnrece vijhéns bedivnut d' fé d' èl Walonreye ene francesse colonêye come li Burtaegne, li Corse u core l' Alzace.
Li tchanteu porshuve eyet finit avou : [FR] "Ce p'tit bout d' terre qui bout, C'est la Wallonie. C'est-à-nous (bis), de lui donner vie." Dji n' va nén cåzer eneviè l' prumîre fraze, mins avou l' sigonde. E-n efet, li prumîre fraze n' a purade, ni rime ni rame, sorlon mi, mins çoula dmane èm advize. Oyi, k' ç' est a nozôtes d' lu rinde vikante, nosse Walonreye. Tchaeconk divreut adji individuwelmint pol Walonreye, des ptits djesses sufixhnut. Nén dandjî d' fé des mirakes.
Bawich li muzike est ene parodeye del veritåve Braibançonne, ime nacionåle bedje. Est-ç ki Monsieu Beaucarne pinsreut k' el Beldjike n' vicreut nén vraiymint ? Mistere ! Do moens, ç' est come çoula ki dji l' aveu comprindou. Dji l' a trové, ossu, ene mitan pus zûnante k' el oridjinåle.
- Droet-å-såme : Droit au but
- Edroescoye (Edroet + Ascoye) : Terre d'accueil
- Zûnante : Mélodieuse