(Èl-Gueuye-Noere – 38inme) 29/08/2022
Kéne tcholeur ! Kéne stofeur ! On n' pout nén dire k' i n' a nén fwait malåde, cist esté ci. On-z åreut brait timpesse po-z awè ene miete di plouve. Contråvmint al termene d' awousse 2021, l' aiwe a vnou a låtchî. Les shuvantès anêyes vont esse målåjheys a sopoirter. S' i gn aveut k' les hôtès timperateures, ça sereut ledjirmint moens pezant. Avoz dalé a dedé ene sadju pindant ces dierins moes ? Mi, dji l' a fwait. Ké disbåtchmint d' vir el verdeur d' passer do viete å djaene. Dji dvize d' çoula tot m' ayant stî pormoenner inte Nîmi eyet Tî. Télcô, i m' shonne ki dji so l' seu a rimårker k' no monde est ki dicwelixhe.
Ça dmore ene rujhe k' el govienmint ni rwaite nén li climat tot-z estant li prumisté des prumistés. C' est l' veur k' i prind, tenawete, mwintès ptitès mzeures. Metans : baxhî l' vitesse permetowe dins les cintes-veyes di cénkante a trinte kilomete a l' eure. Dji n' a rén conte ça, mins dji croe k' ci n' est nén avou des bindlaedjes k' on sogne des crantches. Totfeye, cwand on-z ôt les dijhaedjes des metingues, on croereut voltî awè Greta Thunberg dvans nos. Damadje k' is soeynut honteus come des voleus avou leus fijhaedjes.
Epwis, gn a des sakîs po ramadjî sol dos des ôtes. Dji n' a rén conte les djins pus viyes ki mi. D' ayeur, dji so onk des prumîs a les respecter. Tolminme, ene pitite troke d' inte di yeusses voeynut voltî d' cachî mizere åzès djonnès djermêyes. Copuvite so les suddjets rwaitant l' nateure eyet les candjmints climatikes. El pé di tot, c' est k' ces pretchi-pretchas la fijhnut todi d' leus nez so les rantoeles di soçnaedjes. Savoz, a stou on tins, ces omes eyet femes la estént dins li grande troke des specialisses do cronivirûsse. Adon-après, ils avént divnou des féns cnoxheus del guere d' Oucrinne. I sont rivnou avou les candjmints climatikes. On s' doet leyî adire. Leus cåzaedjes sont mo rizibes. Dit-st i, po rire : « E 1095, dj' esteu djonne. Dji daléve mamborner des musulmans el Palestene avou des soçons, inte di yeusses Godfrwè d' Bouyon. On daléve rola avou des årmeures eyet des spêyes. I fijheut 54°C pindant les estés. Yeyet, on n' aveut pont d' axhlåves eyet pont d' copiutreces. Yeyet, on breyeut nén avou s' tûtûte e s' mwin. »
Motoit ki dji creye å moude on pô. Mins nerén, ene pekêye d' cibernaivieus n' sont nén lon d' èç caricateure ci. Ç' ki m' taene avou zels, c' est k' is montnut bén a leus efants k' is n' end ont keure d' leu avni. On maxhaedje esplôzif d' egoyisté, di grandiveusté, virpus d' afrontisté. El mådjorité n' el fwait, azår, nén esprès. Ils adjixhnut dinsi pask' is dmornut, calfeye, mo ignorant. C' est-st avou ciste ignorance ci k' li djintrinnté dmane manceye. Teyoricmint, el societé s' divreut ervuzionner. Seulmint, ci n' sereut nén pus comifåt d' ès ervuzionner dvant d' el fé avou tote el cominålté ? Dji vs va leyî trankile, asteure. Pôreut vali k' vos daloz trover ene response a cisse kesse sol tins d' vos tuzaedjes.
- S' ervuzionner : Se remettre en question