(Èl-Gueuye-Noere – 26inme) 02/11/2021
L' avoz oyou eto ? Gn a on novea pårti politike do costé del foite droete walone. Chez Nous, dit-st i. El lisse comince a divni ene miete longue. On-z aveut ddja : li Mouvement NATION, li Nos gens d'abord, l' AGIR, el Droite Populaire ey asteure, on-z a Chez Nous. Sins conter les cis k' ont disparexhou come l' ancyin Front national de Belgique u core li Parti Populaire. Ké djeu avou cisse lisse cial. Des nos timpesse yet totavå. Prindans asteme a nén awè må s' tiesse. Pocwè awè askepyî on novea pårti politike come çoula ? Copuvite k' i nd a ene troclêye. Cwand on rwaite dins les ôtès familes, on n' e voet nén ostant. Rwaitans, asteure, tchaeconk d' inte di zels.
Li Mouvement NATION, ça a stî askepyî e 1999. C' est on pårti d' foite droete bedjikinne. Çk' i n' est nén l' cas di tos les ôtes. Enute, c' est l' pus impôrtant ey el pus peuprece del Walonreye. Savoz k' il egzisteut eto e Flande ? Avou l' no : Nationale Beweging. Totfeye, cisse pårteye ci est purade novele. Motoit èn an, virpus deus, pinse-dju ? Dj' a veyou ossu k' asteure, i fijhnut dins l' ecolodjisse ey el feminisse. Djans ; al Nonne del Beldjike ; ci mouvmint la a todi fé berwete. I n' a måy stî e pårlumint. Damaedje po zels, hinant po les cis k' is les voeynut evî. Fåt dire eto k' i n' fijhnut seulmint del campagne so les rantoeles di soçnaedje eyet metinguer so les edroets des avnantès moskêyes. Nén l' pus ahessûle po mi ; mins tchaeconk si gosse, savoz.
Asteure, rwaitans åzès ôtes. Li Nos gens d'abord, ci-la, c' est l' popinete do Vlaams Belang. Adon, co on pårti k' est pus k' oniesse eyet k' a podbon des nôbès intincions. Vlant k' des "Djolis Flaminds" vegnnuxhe disfinde des "pôves walons" conte des "Mançaedjes etrindjires". Tot rwaitant l' AGIR, ci sereut l' novea Front national de Belgique. Ci dierin esteut foirt peuprece, pus k' el Mouvement NATION. Tenawete, il a disparexhou e 2012 cwand li Front National di France aveut stî e djustice conte zelzôtes. Ouy, AGIR est vraiymint on ptit chtroume do monde politike walon. Po li Droite Populaire, ci sereut puvite des wårdiveus k' des recsisses. Asteme, dji n' acertine nén k' les wårdiveus sont tos des djins d' foite droete. Mins nerén, ci pårti la a des ptitès piceures ki nos fijhnut comprinde k' il est purade al limite etur li foite droete. C' est ene mitan come el N-VA, avou les Flaminds. On n' sait nén wice k' on pôreut lzès mete sol mape del politike.
Li dierin d' èm lisse, ki n' egziste pus dispoy les eleccions federåles di 2019, c' est li Parti Populaire. Il a egzisté pindant ene dijhnêye. A s' tiesse, on trovéve Mischaël Modrikamen. Cist ome ci, c' est èn advocåt k' est kinoxhou po s' eblaver di l' "afwaire Fortis". Politicmint, c' esteut on populisse come i gn a totplins dins l' monde politike bedje. Mågré tot, il aveut todi yeu ene mitan ès linwe e s' taxhe. Contråvmint a nosse camaeråde Raoul, ki dimane bén notwere po sovint rouscayî. Udonbén Georges-Louis Bouchez, no Signeur pretchant l' Evandjile sorlon Charles Rogier. Infén, Mischaël Modrikamen ey es binde n' ont måy fé kine ås eleccions. C' est po çoula k' el pårti n' egziste pus.
- Virpus : Voir l'article « Skide eyet Soçons »
- Campagne : Communication politique
- Mape del politike : Échiquier politique
- Dijhnêye : Voir l'article "Vint anêyes pierdowes"