(Èl-Gueuye-Noere – 20inme) 21/07/2021
Les lenes ki shuvnut ont stî scrîtes etur li 2 eyet li 21 di djulete 2021. Li 2 di djulete 2021, c' esteut li spoûlaedje des Rodjes diåles : el dierin simbole d' ene Beldjike uneye. Li 21 di djulete, normåldimint, c' est l' fiesse "nåcionåle". Minme si l' Beldjike n' est nén ene nåcion. Mins bon, dji n' va nén daler pus lon ; dj' aveu d'dja tot scrît dzeu dins l' årtike : Sire, li Beldjike vike core moens.
Come d' efet, les Rodjes diåles esteut l' dierin simbole d' ene Beldjike uneye wice i gn a des Bedjes bedji-bedjes. Si vos rwaitoz foû di fotbale, el Beldjike est kipårtêye e deus : les Walons eyet les Flaminds. Po esse oniesse, el fotbale amateur est ossu kipårtî e deus : les ekipes neyerlandès-cåzantes, d' on costé, eyet les francès-cåzantes, di l' ôte. Ns avans yeu ene dorêye djeneråcion avou l' ekipe bedje, mins ils ont tot brishôdé. Al longue des longues, est çk' el ekipe bedje di fotbale eyet l' payis n' serént nén l' minme tchôze. Ni serént-is nén deus lisses di coûtès djoyes ?
Tot rwaitant l' fotbale : el Beldjike a ene boune ekipe, mins ele n' va måy lon. Les ratournêyes conte el Årdjintene e 2014, conte el Wale deus ans padri, li ci conte les franskignons e 2018, pus li ci conte l' Itåleye cist anêye ci, n' pasnut nén. Les djouweus gåtnut leus cwålités. I m' shonne k' is n' ont måy stî rola sol terén. Dji m' dimande co si l' apriyesse leu sieve a ene sacwè. Ils ont stî tapé a l' ouxh pa l' Itåleye, come ils avént stî conte el Wale, i gn a cénk ans. Ils n' ont nén pierdou pask' el ôte ekipe esteut pus foirte, mins pask' ils n' avént nén l' poûssåjhe po wangnî. Co binåjhe k' is åront co ene tchance dins èn an el Katar. Totfeye, cwand dji rlouke les condicions d' ovraedje des bouteus, çoula m' dene nén el bedivreye d' el rwaitî. Sins conter k' èç payis rola n' a måy djouwé dins ene cope daegnrece di fotbale. Sins conter eto li plôke ecolodjike ki ça serè co. Les setcheurs des dierinnès anêyes yet les grossès aiwes, insi k' les ricrexhaedjes des dierins djoûs divnnut carapmint alårmant.
Asteure, dji va responde el kesse di lanawaire : est-çk' el ekipe nåcionåle ey el Beldjike sont deus coûtès djoyes ? Cwand on rwaite les deus, on s' rind conte k' ces deus institucions cial n' sont nén vraiymint diferintes. Deus institucions ki prindnuxhe puvite les afronts po des coplumints. Deus institucions ki s' mindjnuxhe les sonks cwand eles fijhnut ene sacwè. Eles n' ont nou zinguezåre, pinse-dju. C' est avou l' pus grande des disbåtches ki dji scrît cist årtike ci. Tolminme, is shonnnut bén amiståves eyet tertos dit d' zels k' ils sont d' bons soçons. I gn a Eden Hazard ki sait cwand i pout esse crevant eyet cwand i doet esse serieus. I gn a Kevin De Bruyne ki vs dit les tchôzes droet dins les iys, come cwand il a dit : "J' sais pas. ... J'm'en bats les couilles." ([WA] Ki dj' è sai mi. ... Dj' a ndè rén a fote.). I gn a ossu Romelu Lukaku k' est foirt kinoxhou po esse on grand bateu. Adonpwis, i gn a les ôtes k' is sont moens metous e dvant-plan. Sins rovyî les cis ki sont pinsionés, enute, eyet k' is mancnut : come Vincent Kompany u core Daniel Van Buyten. Dji so l' prumî a ricnoxhe ki ces djouweus shonnnut esse des bonnès djins. Ils ont minme decidé di dner leus primes k' ils avént riçou pindant l' Uro d' fotbale åzès victimes des grossès aiwes eyet ricrexhaedjes.
Al copete do mårtchî, dji n' so nén l' seu a croere ki les "Bedjes" (purade les Walons) n' ont, djenerålmint, nou zinguezåre. Come d' efet, dj' a lejhou èn årtike sol waibe del La Libre Belgique ("Le sentiment d'infériorité des Belges est programmé dès l'école", scrît pa on contribuweu sins no). El scrijheu d' cist årtike ci ey èm-minme displojhans li fwait k' el acseignmint el Beldjike, purade el Federåcion Walonreye-Brussele, dimane mier francijhî. Adon, i gn a li fwait k' les Flaminds si rwaitnut putoit come Flaminds padvant d' si rwaitî come Beldjes. El dislaxhaedje flamind est d' pus e pus djondant. Rloukîz les diernîs ploncaedjes po les votaedjes eyet vos comprindroz ene miete pocwè. Li Walonreye s' doet î apontyî.
Al fén des féns, les Rodjes diåles, c' est ene ekipe d' el leccion do fotbale daegnrece. C' est l' seule grande ekipe k' a on palmaresse pus maigue k' el ci di l' Esportigne di Tchålerwè. Les soreyalisses sont batous dvant cist ecramiaedje la.
- Bedji-bedje : Belgo-belge
- Metous e dvant-plan => Mete e dvant-plan : Mis en avant => Mettre en avant
- Esportigne di Tchålerwè : Sporting de Charleroi