(Èl-Gueuye-Noere – 37inme) 16/08/2022
Binamêyès djins, dji vos va conter ene pice. Ça n' mi rwaite nén, udonbén nén directumint. Savoz, çoula frè deus ans, li 26 d' awousse, ki dj' a cmincî a scrire èm pitite gazete. Asteure, dj' a eplaidî 36 årtikes da mi. Tolminme vos dvoz sawè, mes djins, k' i gn a des årtikes ki sont scrîts dispu lonmint. Ces årtikes la n' ont nén co rexhou droci. Kécfeye ki sacwants d' inte di yeusses n' vont måy moussî foû. Savoz, mes djins, dji n' so nén li prumî scrijheu a l' fé. Avou ça ki dji n' srè måy l' dierin oteur a fé çoula eto. Pindant ki dji toûne èm lete, avou ene cråsse blonde bire sol scrîftor. Azår k' i gn a des sakîs emey vozôtes ki volnut sepi mes catchotreyes. Ça dmore comifåt : l' umin, c' est ene biesse k' est curieuse. Gn a rén avou ça. Totfeye, dji vos va priyî di prinde pacyince. Dj' ô bén k' i fåt rastinde ene miete.
Adon, vs mi daloz dandjreus dmander pocwè. Mwintès djins pinsnut puvite ki dji mi tchapne. Po-z esse oniesse, c' est l' veur po ene d' mes prôzes. Gn a, come di djusse, on sudjet ki dmore målåjhey d' cåzer dvins tertot. Des sakîs m' ont ddja må veyou paski dj' a ene manire di tuzer ki voeynut purade evi. C' est leu droet d' esse nén d' acoird avou mi. Mins nerén, ci n' est nén po ça k' i m' fåt rwaitî come on diåle. Dji croe k' il est mî di dmaner drovou åzès idêyes des djins. Télcô, dji vs el achôde, ci n' est nén possibe. Foiravant, avou les sondjaedjes estremisses k' on doet houwer.
Po les cénk ôtes, c' est fén diferin. Troes d' inte di zels n' sont nén presses. Poirtant, dji ls a ataké dispu des moes et des ramoes. El stîle di scrijhaedje ni m' etaite afeye nén. Ç' ki m' catibule sovint, c' est les rdijhaedjes. Motoit k' ça vént d' èm tiesse di francès-cåzant, veyånmint k' el lingaedje da Molière est ossu èm lingaedje di mame. Houte di çoula, el motlî ki dj' uze mi shonne pacô mo simpe. Tot-z estant on linwinceu, dji vs pou acertiner ki dji dmore foirt spepieus å rgård d' mes biyets d' oumeur. Yeyet co, si vs savoz, el nombe d' arimeas ki dj' aveu scrît, mins ki dj' a disfacé. Dji croe awè on bea livea e walon, mins dj' a co bråmint a-z aprinde. Damadje ki ci n' soeye k' on lingaedje ki dji dvize dispu enawaire : troes ans.
Pol dierin årtike, dji vos va leyî adviner el råjhon. Dj' a les pinses ki dji m' a cfessé assez po ouy. Po vs rapåjhi : gn a kékes tecses k' ont rexhou dins l' gazete, k' ont stî lontins dins les ridants. C' est-st ene miete po ça k' èç årtike ci a stî eplaidî tårdou. Li shuvant côp, gn årè des tecses so deus sudjets ki m' dinnut di l' inspiråcion. Tenawete, i m' fåt leyî l' tins d' escrire tot ça so papî éndjolike.