(Èl-Gueuye-Noere – 40inme) 08/10/2022
Li walon, c' est on lingaedje fwait pa ki ? Dazår k' c' est on lingaedje naturel. Adon, i n' a nén stî edvinté pa ene sakî. Ci n' est nén di l' esperanto ubén do volapouke. Droci, dji n' cåze nén d' ès-n' askepiaedje. Cwè k' ça sreut foirt ahessûle d' fé on tecse sol scripta : dj' ô bén l' vî walon. Dji dvize puvite sol comint el walon est mamborné, dins l' bea sinse do mot, da. Sovint, les pårlers sont viernés pa des soces. Metans, li francès. On-z a, d' aboird, l' Académie Française ki dmeurnut l' pus impôrtante, tot-z estant l' pus schoûtêye. Houte di çoula, vs avoz eto deus ôtès academeyes po cisse lingaedje ci : onk el Beldjike ey onk el Kebek. Sacwants n' end ont k' onk, come li daenwès. Pus råle : les cis ki n' end ont pont. Vloz èn egzimpe ? L' inglès. El savîz ? Si neni, estoz-vs sbaré ? Si oyi, c' est comprindåve. Come di djusse, l' inglès dimane comon sins esse ecådré : come cwè.
Amon nozôtes, mwintès soces si rwaitnut voltî tot-z estant les sorwoeyantes do lingaedje da Defrêcheux. On va prinde, roci, rén k' les pus grandes. Taiss k' oyi k' l' adierça d' ces organizåcions est onoråbe. I fåt, come d' efet, ene cogne d' otorité, oudonbén tchaeconk pôreut fé come i vout. Daloz m' rimimbrer ki l' inglès n' a nén ene troke drî. C' est l' veur. Totfeye, les egadjmints sont bén rola. Dj' ô bén : gn a, tolminme, di l' otorité. C' est pa l' aidance des nouzomès univiersités : Oxford, Cambridge, et tchik et tchak. Télcô, les rîles ni savnut nén houwer mwints disboirdumints. C' est l' cas avou li lingaedje da Molière eyet ses noveles môdes d' escrire siclimboignes. Kéne afwaire avou yeusses ! Vacobén k' eles n' sont nén ricnoxhowes.
Dji va-st ataker avou l' ci ki dji cnoxhe el mî : Li Rantoele. C' est l' seule ki boute avou l' rifondou. C' est, djustumint, on d' ses beas costés : d' ovrer e rfondou. L' avance do rfondou, c' est bén d' esse comprindåve pattavå el Waloneye. Çk' est tot ossu bén avou zels, c' est k' is n' roistêynut nén l' Feller evoye. Lucyin Mahin, l' ome el pus aflouwant di Li Rantoele, porshût a scrire avou s' Feller. Motoit bén moens ki dvant, mins i l' fé co. Amon les gaztîs, c' est li prumire soce a adopter ene aprotche dmorant dins l' toledjoû. Tenawete, on rleve el minme fenominne ayeur. Davance, c' esteut aprume des scrijhaedjes pår målåjhey a rmete dins l' tins. Come si les oteurs estént mimbes d' èn univiers ewou çk' el walon avént stî egayolé.
Ene tchôze k' on pout rdire avou cisse rantoele ci, c' est k' les egzamineus ont stî ene miete trop rade. Dj' ô bén k' on n' askepeye nén les 50 å cint d' el rifondaedje di l' ortografeye d' on lingaedje e-n on raploû. Po çoula, on rmårke k' i gn a yeu sacwants candjmints dispu. Des ptits candjmints, siya, mins ça vout mostrer ki rén n' est aclatchî. Des sacwès avént stî atåvlêyes, mins on n' elzès a nén prindou : li betchfessî « - lh- », come imådje. Pôreut vali, k' a l' avni, ene riforme si fwaixhe. Des sakîs ont ddja pinsé a èn ôte rfondou, notanmint el « rifondou avancivös ». Mwincô k' on lzès pôrè comparer on djoû. Mins nerén, fådrè co rastinde lonmint, veyånmint k' les askepieus di l' « avancivös » boutnut co grandmint dzeu. On live a rexhou lanawaire so ç' pordjet ci. Les esplicaedjes sont fén spepieus : ene clapante alûre ki sint l' serieus. Seulmint, dji croe k' ces ovreus la pinsnut dpus k' i n' fåt a l' etimolodjeye. Djans : al môde do francès. Dji sai scrire e rfondou « wardiveus », dji sai lére les sistinmes Feller, mins dj' a afeye do må timpesse a-z etinde l' « avancivös ». A-z aveuri, adon.